Madrina y Padrino no ta mara na ningun religion, ta dos persona cu ta wordo escogi door esposo y esposa y nan ta dicidi ken ta bira madrina y padrino di nan yiu. E Mayornan aki ta hopi contento, y nan ta busca cu tur seriedad ken por bira madrina y padrino.
Madrina y padrino no por wordo escohi pa e placa cu nan tin, pero pa seriedad cu tin den nan bida y cu nan por duna un bon ehempel den nan propio famia y comunidad.
Madrina y Padrino ta dos persona responsabel, cu por si acaso algo sosode y e mucha keda Huerfano, nan por tuma e mucha over y cria den tur respet na lugar di su tata y su mama.
Nos ta kere cu awor tur hende por compronde dicon nos norma y balor a cay asina tanto, y dicon nos mentor nan di famia ta asina poco, no tin hende cu por duna ehempel, ni tampoco conseho.
Pasobra awor madrina y padrino no ta wordo escogi den seriedad , pero pa e placa cu nan tin, pa auto bunita, of fama y pa cuanto bebida nan por cumpra pa e fiesta.
Un Padrino of Madrina mester ta un persona integro , cu autoridad, cu si e mira su iha ta haci algo robes, e por hala su atencion, y si Mayornan ta for di ordo y no ta lanta yiu cu respet. tambe e mester interveni.
Awendia tin hopi padrino y madrina cu tin miedo di papia cu nan iha, pasobra nan no a tuma e asunto na serio, y nan a hacie djis pa un tradicion, of pasobra nan a a wordo pidi , hopi ta scohe hende pa titulo of posicion, sin wak integridad.
Un padrino of madrina mester ta un persona integro, reponsabel tur momento, pasobra awor cu nos sa cu integridad ta bini di Dios pasobra ta Señor ta sostene nos integridad ( Salmo 41 vers 12) , Señor so por libra nos di tentacion ( Mateo 6 vers 13). Integridad ta mara na e palabra di Dios, sin Dios integridad ta simplemente un formalidad.
Laga nos corda kico e casa di Job a bise ora cu nan a perde tur cos den Job capitulo 2 vers 9+10 : Ainda bo ta mantene bo integridad? Maldiciona Dios y muri.
Mas hende responsabel y integro por papia den bida di un hoben, mihor resultado lo tin pa bida di e hoben ey si specialmente nan ta siñe den e amor y displina di Señor.
Laga nos tene cuenta cu esaki y nos ta haci un yamada riba madrina y padrino pa duna un man den educacion di muchanan den e tempo dificil cu nos ta bibando aden, yuda vigila, yuda
conseha, pasobra di berdad dianan ta trabahoso, tempo ta dificil y e malbado su bista ta riba e muchanan pa destruccion.
Na unda e berdadero Padrino y Madrina cu ta integro bibando pa Señor ta,a bira tempo pa tuma bo responsabilidad y yuda educa hubentud.
