Director di Imsan, dr. Joel Rajnherc a conta cu Imsan ta den negociacion cu e contratista general, cu lo bay tuma e trabao. E proceso di destaho publico a tuma luga y ta spera cu dentro di poco, den algun siman, firma un un contracto cu e contratista y su subcontratistanan, pa haci henter e ehercisio di e masterplan di Imsan, cu ta resorta den un cuminsmento di traha e bunker pa e aparato di bestraling, cu ta bay ta esun di mas moderno cu ta existi na henter mundo. No tin pais Latino Americano ainda, cu tin e mesun aparato ey.
Na Merca tin algun den operacion. Na China tin di compronde, nan a caba di pone dos den uzo, Europa no tin’e tampoco ainda. Kiermen cu Aruba ta hopi avansa riba e ekipo ey.
Ta bay habri dos sala di operacion pa operacionnan general. Un specificamente pa problemanan di wowo. Lo haya un departamento grandi pre-operativo y post-operativo. Lo amplia e servicio di radiologia. Ta bay cambia henter SEH y eseynan ta e departamentonan mas importantenan cu ta cambiando. Ya ta bezig cu cambia e dak, pa percura pa tur cos ta cla pa ora cu e construccion grandi bin. Lift nobo tin cu bin. Henter e planta central di energia lo bin. Tin e bon suerte cu mas lihe cu a kere, a haya full aprobacion di e bouwvergunningnan, cu ta den poder di Imsan caba. Nan ta ranca core, ora cu pone pia riba tera, segun dr. Rajnherc.
Hospital pa San Nicolas
Por sinti den pueblo cu tin e deseo pa un hospital. Hasta tin cierto politiconan cu ta papia di esey. Segun dr. Rajnherc, no ta bisa cu Imsan no ta interesa den esey. No kier pa e interes cu nan tin pa bira un hospital di shortstay, bay interferi cu e comienso di e masterplan cu tin na e momento aki. Ya varios biaha mester a cambia nan plannan. No por a ehecuta nan, a base di cambionan cu a bin politicamente. E proyecto aki ta cla pa ranca. Ta bon pa cuminsa esaki y entretanto por desaroya e resto di e programa pa ehecuta y bira un hospital di shortstay.
Deadline pa e proyecto
Awor aki nan ta den fase di comienso di e construccion. Ta spera cu entre 18 pa 20 luna, por pone e prome piedra pa e piso un biaha mas. Ta spera pa aki paar di siman por cuminsa, banda di fin di April. Esey ta e dato cu ta streef pa yega eynan. No tur fase ta bay ta cla na e mesun momento. Ta cuminsa den diferente fase y manera cu un fase cambia, ya por cuminsa cu e tratamentonan eynan. Mesora cu ta bay cuminsa cu un construccion, tambe ta bin e fase di operational readiness, pa percura pa tur ta traha manera cu mester traha protocolariamente, pa acredita nan mes pa un JCI. Tur e procesonan aki ta cana na e mesun momento y na final, despues di aproximadamente 18 pa 20 luna, mester yega na un final cu ta cla cu e prome parti di henter e proyecto cu ta realisa na Imsan.
