Nos federacionnan deportivo ta traha cu un vision cu e meta principal pa guia nan deporte riba e bon caminda y percura pa e desaroyo di tanto nan atleta, coach y dirigentenan ta uno positivo unda e deporte ta prevalece den tur sentidodi palabra.
Pa haci esaki mester traha riba un bon base mientras e upgrading di e conocemento di e materia encuestion no por keda atras. Den e ultimo tres anjanan, Aruba Basketball Bond a trece diferente experto fordi exterior pa yuda na e bon desaroyo di nan atleta y coachnan. Recientemente a contrata un coach profesional Jeff Eakin procedente di Merca pa bin duna un man na e basketball di Aruba. Pa 10 dia largo coach Jeff Eakin a traha 100 mucha entre edad di 10 – 18 aña. E la traha cu nos muchanan no solamente pa introduci na nan e principionan basico y fundamental di e deporte di basket pero tambe na analisa nan profundo di defensa y atake den ekipo. Tin algun aspecto cu coach Eakin como entrenado riba nivel di NBA y NCAA na Estados Unidos tabata por a observa den practica cu nos atletanan. “Tin un deseo entre muchanan di tur edad na Aruba pa siña y practica e wega di basketbal. Durante 10 dia mi tabata tin contacto cu mas di 100 mucha cu tabata bin trempan y bay laat pa por a practica y cu despues di 10 dia no tabata kier pa mi bay pasobra nan kier siña mas. Nan ta stima e wega pero mas cu tur cos nan ta stima cu e wega ta duna nan algo pa haci y alaves algo
pa traha na dje riba cancha, den klas y den comunidad.
E campo di entrenamento aki a duna hopi mucha y nan mayornan speransa pa medio di pone metanan nan dilanti. Cada un di nan lo ta desea di hunga basketbal den “high school” y/of “college” specialmente na Estados Unidos. Tabata un “eye opening” pa nan pa haya sa cu loke ta mas importante pa un entrenado di college manera mi mes ta pa e hungadornan ta bay bon academicamente na prome lugar despues ta bin talentonan riba cancha. Hopi hoben a disidi pa haci nan best miho na scol y bin cu un diferente actitud. Door di continua cu e programa aki na Aruba sigur sigur lo yuda e hobennan aki pa ta mas exitoso pafo di cancha y den nan respectivo careranan y asina yuda esnan rond di nan”, coach Eakin a conta. Pa coach Jeff Eakin e tabata un placer pa traha cu tur e entrenadonan y hungadornan di Aruba.
Nan a siña hopi y ainda tin un caminda largo pa bay pero dor di e pasion por a mira claramente cu Aruba su hungadornan kier ta exitoso den nan deporte pero mas cu tur cos den nan estudio y den nan bida cual sigur ta e mas importante. Un danki sigur na Lotto, e Loteria di Aruba pa medio di St. Sportsubsidie Aruba cu a subsidia henter e proceso di e binimento di e coach di basketball Jeff Eakin di Merca.Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.
