Recientemente tabatin e oportunidad di combersa cu Nicolas Mosquera na Hulanda. E ta un cantante y productor musical local, miho conoci bou di su nomber artistico Ozin. Buscando horizontenan nobo, Ozin a traslada pa exterior caminda e ta sinti cu un mundo nobo a habri y cu a permitie crece como artista.
Despues di algun tempo trahando temanan na Aruba, Ozin a sinti cu el a yega e plafond di su nivel y tabata cla pa crece y busca retonan nobo. Na prome instante el a opta pa bay Colombia, pero door cu e stap aki a coincidi cu e pandemia, cosnan no a bay manera el a spera. Despues a presenta e oportunidad di bay Hulanda y awendia e ta conta cu e ta hopi contento di con ta bayendo te aworaki.
Mosquera ta haya cu e Hulandes ta habri pa traha cu otro hende; nan ta dispuesto pa siña bo. Den e industria musical, nos hendenan di isla falta hopi conocemento den e parti di business, pero ta compensa den e parti creativo, e ta splica. “Aki bo ta traha cu productor y den studio, pero den parti creativo Aruba no tin nada di envidia. Asina mes mester a bin akibanda pa crece den e parti di negoshi,” e hoben artista ta indica.
Na juli ultimo el a lansa un album titula Antias totalmente produci door di su mes. Esey tabata pa e fanatico cu ta siguie di tempo e tabata na Aruba. Aworaki e ta trahando den colaboracion cu un label Hulandes trahando riba un EP. E ta splica cu e inspiracion ta totalmente diferente na Hulanda. E ta sintie influencia pa tur cos: e clima, color y hendenan. E ta sigura cu por spera hopi di dje. E kier bin cada bes mas creativo, probechando di tur opcion cu tin rond di dje y e hendenan cu ta agrega balor na su proyectonan. E ta priminti di trece hopi creatividad y su best.
