Awe e conocido Ruben Krozendijk a perde e guera contra e enfermedad cu e virus Covid-19 ta trece cu ne. Apenas el a cupli 64 aña di edad, a baha cu pensioen na trabou, cu el a contagia cu Coronavirus, bira hopi malo, condicion di salud a keda empeora, te cu awe mainta no por a haci nada mas p’e y el a fayece. El a bay laga atras su señora y dos yiu.
Ruben Krozendijk di Santa Cruz, ta ruman di ex-polis Shon Pe Krozendijk, a bataya como 35 dia largo cu Covid-19. A drenta hospital, tabata interna den cuido intensivo, debi cu e tabatin problema cu halamento di rosea. Ta conoci cu un di e efectonan directo cu Covid-19 ta bin cu ne ta un malfuncionamento di e pulmon. Consecuentemente e pashent ta sinti falta di rosea y ta ansha, ta cansa lihe y casi no por papia mes pasobra no tin rosea. Dokternan mesora ta opta pa bay na mashin, pa garantisa cu e pashent ta keda na bida.
Hasta minister Dangui Oduber a dedica algun palabra special pa e victima awe. Casa di e minister mes ta(bata) traha na SVb y como tal conoce e defunto bon. E mandatario a skirbi: “Un rato pasa nos a wordo informa cu Ruben “Wunibaldo” Krozendijk a caba di fayece. Despues di a lucha pa mas cu 35 dia cu Covid-19 den hospital, lamentablemente el a perde e bataya contra Covid-19. Ruben a labora hopi aña na SVb y tawata masha keri cerca tur su coleganan. Mi kier a desea Marline su casa, henter famia, su coleganan di SVb condolencia y hopi forsa den e momentonan hopi dificil aki. Cu nos amigo Wunibaldo sosega na paz.”
