Si papia di costo di bida aki na Aruba, un di e gruponan mas afecta ta e pensionadonan. Den e reciente foro nacional di Adulto Grandi a bini dilanti cu e entrada cu un pensionado ta ricibi ta menos cu e salario minimo. Specificamente, e ta 63% di un salario minimo aki na Aruba.
Esaki mientras cu nan gastonan ta di bida ta keda practicamente mescos.
Adulto Mayor ta un tema cu tin atencion di sector politico tambe. Incluso recientemente Gobierno a anuncia cu a base di evaluacion haci, a dicidi cu entrante prome di januari, 2024 lo aumenta e pensioen di behes cu 3%.
Pero un bida di calidad di un Adulto Mayor ta encera mucho mas cu e entrada cu e ta ricibi mensual, y Otmar Oduber (ex-minister) a bisa cu e ta consciente di e tema. Pa e motibo aki tambe el a reuni recientemente cu e organisacion di pensionadonan OPPA, unda a papia riba temanan cu pa hopi aña ta na discusion caba. “Na e momentonan aki, en general, e hendenan no por biba cu e prijsnan di cuminda, di gasolin, di utilidad. E no ta un grupo chikito pero den tur categoria, ta sinti e efecto di prijsnan hopi fuerte den nan cartera.”
Pero, Otmar Oduber a sigui bisa, no por nenga cu un grupo cu ta hopi vulnerabel ta esun di pensionadonan. Y no ta papia aki di un grupo chikito. Segun cifranan di Oficina Central di Estadistica ta papia aki di casi 22 mil persona cu ta cay den e categoria aki. Di e grupo aki, segun Otmar Oduber, rond di 14 mil florin ta cobra menos di mil florin pa luna. “Un hende asina no por biba cu esaki.”
Pa un relato mas amplio, esa TREMPAN.
