E siman aki por a scucha relato di Boneiro cu a menciona cu e nivel di inflacion di e isla a baha. Aunke cu Minister di Asuntonan Economico Geoffrey Wever no por a bay den detayes, si a bisa cu “nos inflacion tambe ta desaroyando positivamente. Denter di poco mi lo elabora specificamente riba e topico aki,” e mandatario a bisa.
Pero e calculacionnan cu Gobierno a haci ta mustra cu despues di pandemia e inflacion tabata hopi halto, pero despues a constata cu el a cuminsa baha. Tur cos ta mustra cu e aña’ki e ta bou di 5% mientras cu pa otro aña e mandatario ta kere cu e lo ta bou di 4%.
Lamentablemente e no tabatin tur e cifranan na man pa bay den detaye riba e tema di inflacion. Si el a priminti cu pa otro siman cu e tin tur dato, e lo por duna un analisis completo cu ta mustra cu inflacion na Aruba ta bahando. “Mi ta kere esey ta un desaroyo sumamente positivo, pasobra na inicio di e gobernacion aki nos tabatin un inflacion hopi halto, cual ta un peso grandi riba nos consumidornan.”
El a splica tambe cu ta uza inflacion pa midi e aumentonan di prijs. “Mirando cu e inflacion ta bahando, mi ta mira esaki como un desaroyo positivo.
Di otro banda, no mester lubida cu e guera na Ucrainia tambe tabatin su impacto negativo riba inflacion na Aruba. Awo tin otro conflicto den Medio Oriente cu tambe lo por impacta prijsnan internacional di petroli. “Esaki lo tin un efecto directo riba inflacion local – door cu Aruba ta importa e productonan aki pa produccion di awa y coriente. Esaki ta nifica cu e ta afecta e inflacion local directamente.
“Nos ta monitor e situacion describi y pa otro siman lo sali un publicacion mas amplio riba desaroyo di inflacion. E ta bayendo direccion sumamente positivo.”
