Politico Otmar Oduber ta bisa cu e preocupacion ta sumamente grandi pa loke ta e situacion na Parkietenbos desde cu un carta a leak. E minister di Naturalesa den e caso aki no a notifica vecindario of comision di habitante na Simon Antonio y Parkietenbos pa tuma e decision di bay bek pa uza un open air burner. Esaki simplemente ta ora bo ta gara bestia morto, desperdicio medicinal y sludge pa kima hunto cu palo. Esaki ta seca e materialnan un poco pero no ta funciona, segun Oduber, y cual tabata un desgracia enorme p’e pais aki cual a termina e proceso aki tambe na 2018 completamente.
E carta cu Oduber ta papia di dje ta esun cu DOW a manda pa Minister di Naturalesa Ursell Arends, pidiendo permiso pa uza por lo menos dos open air burner. E mandatario a duna aprobacion, mara na algun condicion y pa maximalmente 8 luna, mientras cu ta busca un otro solucion.
“Aworaki minister ta tuma decision pa bolbe bay e direccion aki. Esaki ta un denuncia publico, e ta inaceptabel pa bay bek na e situacion eynan.” Oduber ta subraya cu e propio minister ta bisa den su carta cu e no ta den cuadro di maneho di medio ambiente pa Aruba. E mes ta bisa den e carta cu e no ta e sistema di mas deseabel pero toch ta bay bek n’e sistema aki simplemente pasobra no tabata tin e vision y no tabata tin curashi pa tuma decision pa por tin hindervergunning den luga.
Tabata uza un incenirator cu si ta funciona uzando sistema cu ta controla exactamente tur aire cu ta bay den halto, segun tur norma internacional y cu tabata poni tambe den destaho publico. Pero a ‘overburn’ e incenirator e tempo ey, kimando mas sushi di loke tabata por den un forma nechi – sin cu ta mira e huma, desaster of peliger cu esaki tin pa higiena – mester a busca mas pero nunca a busca mas y no tin decision di parti di gobierno p’esaki tampoco.
“DOW mester ta sincero cu e comunidad di Aruba. Mi tabata minister di DOW anto a laga traha rapport e tempo ey. Despues cu pa cuater aña largo tabata paga un compania na Aruba 1.7 miyon florin pa aña pa kima e sludge aki, a resulta via rapportnan cu p’e tempo ey 90% tabata kima – unicamente 10% tabata kima sludge – y 90% tabata sali manera cu e tabata ta, y lo tabata bruha e tempo ey cu tera riba dump creando un aspecto a-higienico enorme pa nos comunidad. “Mi no ta compronde con por ta posibel pa bay bek den e mesun sistema ey. Ta costa 100 pico mil florin atrobe, mas cu 1.2 miyon florin pa aña paga pa procesa desperdicio aki na Aruba cu simplemente no a funciona.”
