Awe mainta e organisacion di OPPA (Organisacion di Pensionado Publico Arubano) a tene un celebracion cu tema di Dia di Rey, pues a opta pa celebra esaki e siman aki caba. Ivo Valdes, presidente di OPPA a conta cu nan a pasa un rato ameno y por a socialisa y come un dushi desayuno rondona pa blaas oraño y e colonan di e bandera Hulandes.
Mas cu claro, tin un comision na luga p’e organisacion di OPPA cu ta organisa e tipo di actividadnan aki p’asina e miembronan di e organisacion por gosa y socialisa cu otro na nan sede. Mesora Valdes a pasa palabra pa Elaine Canhigh, kende el a describi como e motor tras di e evento cu a tuma luga awe.
Asina Canhigh a bin conta cu tur luna OPPA ta organisa un actividad pa su miembronan y debi cu otro siman lo celebra dia di rey, a dicidi pa tuma e tema aki y a opta pa haci un actividad yama “Ban topa na OPPA” y a decora e luga cu e colonan di Hulanda y di e rey.
Idea tras di esaki tabata pa e miembronan sali for di nan cas y topa otro na e sede di OPPA p’asina por socialisa, intercambia opinion y pasa un dushi mainta entre nan cu nan. Canhigh a bisa cu OPPA tin 1.400 miembro, pero debi na e pandemia, mester a limita e tamaño di nan actividadnan y esaki ta pone cu e miembronan tin cu yama, inscribe y reserva pa tin un maximo di 60 miembro pa cada actividad. Esaki ta pa tene toch e distancia social y mantene nan mes n’e reglanan di DVG.
Pa otro luna, OPPA lo bay organisa un actividad di dia di mama. Pa esaki nan lo bay tene un lunch na Rennaissance y cada miembro cu inscribi pa esaki lo haya un bon y asina un biaha mas nan lo por gosa y socialisa y papia riba e topiconan cu ta di importancia pa nan.
