E di 5 edicion di Long Table Aruba, organisa pa Wind Creek Aruba, ta bek pa un anochi, e unico mesa di cena di mas largo completamente blanco cu un balor di $50,000 na Aruba!
E evento di e aña aki lo tuma luga diadomingo 11 di Juni y lo conta cu un mesa largo di 1000 pia cu lo ta prepara pa mil invitado riba L.G Smith Boulevard dilanti Renaissance Wind Creek Aruba Resort. Ticket pa entrada lo ta $50 y lo ta pronto disponibel pa benta.
Desde aña 2017, Long Table Aruba a recauda mas di $225.000 p’e organisacionnan local y ta un evento sumamente importante pa Wind Creek na Aruba.
E evento di e aña aki tambe lo marca e di seis aniversario di Wind Creek Hospitality hunto cu Renaissance Aruba. Pa celebra e momento aki, Wind Creek Hospitality lo entrega 5 organisacion $10.000 na cada un, totalisando $50.000 di donacion, cual lo t’e suma di mas hopi cu Long Table Aruba lo entrega te cu awo.
“Nos ta compronde e importancia di conecta cu e comunidad y nos ta desea pa sostene organisacionnan local na e manera cu lo realmente beneficia e comunidadnan di Aruba,” asina Paul Gielen, Wind Creek Aruba General Manager a declara.
E aña aki nos kier a duna mas tanto organisacion e chens pa participa, aportando asina pa por logra cu nan mision pa mehora nos isla.”
Cuminsando desde 28 di april, e organisacionnan local cu ta interesa pa forma parti di e competencia por registra na Wind Creek Aruba su ‘community online video program’, organisacionnan local lo tin cu crea un video splicando e motibo pakico nan ta desea pa ricibi e donacion aki.
Tur video cu entrega lo ta publica riba Wind Creek Aruba su website unda cu pueblo di Aruba lo por vota p’e 5 video nan ganado di e aña aki.
Tene e siguiente puntonan den consideracion:
- Solamente organisacion local – non profit y cu ta activo, por participa n’e competencia
- (empleado den servicio di Wind Creek Aruba no por participa)
- Lo mester entrega un video di 30 pa 60 seconde mustrando e meta di e organisacion, ken nan ta, kico nan ta haci y pakico nan ta desea pa ta scogi
- Lo mester upload e video aki riba e link Long Table Aruba | Wind Creek Aruba prome cu dia 22 di mei 2023
- Tur video ricibi lo ta publica sin ordo riba e pagina di Facebook di Long Table Aruba pa pueblo di Aruba por admira
- Pueblo por vota pa nan video preferi entre 22 di mei te cu 4 di juni 2023
Mescos cu aña pasa, comunidad di Aruba lo determina cual organisacion lo beneficia di e premio di e aña aki via un proceso di votacion online cu lo cuminsa desde 22 di mei. Haci un impacto den comunidad y duna alivio durante calamidad ta un principio di operacion di Wind Creek Aruba.
Desde yegada di Wind Creek na Aruba nan a recauda fondo pa medio di diferente evento, manera Long Table Aruba y Winter Wonderland como tambe un cantidad di donacion di cuminda cu a entrega henter aña n’e organisacion y e personanan den necesidad.
Gielen ta continua: “Nos ta sumamente orguyoso y entusiasma pa no solamente ofrece un experiencia excepcional n’e lidernan mereci di comunidad pero alabes por conecta cu e pioneronan pa por mira con y kico mas nos lo por haci pa por sostene nan metanan. Nos ta sinti nos mes honra pa por ofrece e pueblo di Aruba un otro anochi inolvidabel unda nos lo duna bek y celebra hunto cu nos comunidad di Aruba.”
