Awor Caya Principal tin un complejo di apartamento nobo den Caya G.F. Betico Croes. Roncado Management & Development NV ta un compania local cu ta maneja varios propiedad den Caya principal di Oranjestad den e skina y area rond di Plaza Niki Habibe. Director di e compania, Mr. Tieleman, semper a y ta kere den nos caya principal. Esaki a pone tambe pa tuma e iniciativa pa haci un inversion nobo. Tin basta tempo caba cu nos Caya principal ta bai atras. Tiendanan ta serando tur dia door di no tin actividad economico den caya door di multiple problemanan cu ta acumulando pa hopi anja caba. No tin control riba permisonan pa mall pafor di centro di cuidad, y di otro banda no tin incentivonan, entre otro fiscal, pa bin habri negoshi den nos Caya Principal. Cumpradornan no ta bin den caya mas, y mas edificionan ta kedando bashi. Mr. Tieleman si ta pensa cu tin hopi otro opcion pa yuda rebiba caya. Sigur e ta kere cu niun hende mester keda sinta keto y warda pa otro haci algo pa nan. Cada commerciante mester tin un tiki iniciativa y vision di nan mes, sigur esnan cu tin propiedad den caya, pa bin cu ideanan nobo pa caya. Un ejempel ta espacionan residencial. Hopi edificio ta bashi na di dos piso, fuera di awor ta bashi abao tambe. Esaki tambe tawata e caso aki , unda awor a converti full e di dos piso di nan edificio den 5 apartamento. Cada apartamento ta hopi espacioso y ta consisti di 2 camber, 1 banjo, sala/comedor, “ingebouwde kasten”, deposito y balcon. Tur apartamento ta full equipa cu cushina completo cu stoof, frigidaire, microwave y tambe tin un washer cu dryer. Tur apartamento ta full muebla. Actualmente tin dos complejo di apartamento y AirB&B caba rond di Plaza Niki Habibe. Hunto cu e otro apartamentonan, Mr. Tieleman tin un vision pa haci full e area rond di Plaza Niki Habibe, uno residencial combina cu actividad nobo commercial, ariba vivienda, abou commercial. Y logrando esaki, automaticamente bo ta crea otro actividad economico pa e area. Lo bo atrae otro tipo di negoshi, manera diferente retail outlets, cafes, minimarkets etc.. Mas ainda, bo ta crea control social y bo ta crea bida bek den Centro di cuidad. Pa luna di Januari e trabaonan lo ta full kla. Diasabra awor, december 8, lo tin un “open house” for di 11am te cu 2pm. Tur ta bon bini.
