A pasa basta tempo cu a cera Departamento di Asunto Social (DAS) na Lagoenweg pa mantencion. Y mas cu un aña despues ainda nada pa habri su portanan.
Hasta tabatin entrega di yabi di e proyecto “Groot onderhoud gebouw A en aanleg parkeerplaatsen Directie Sociale Zaken te Oranjestad” door di Minister Glenbert Croes na Minister Tjon.
Den conferencia di prensa Minister encarga cu Asunto Social, Rocco Tjon, a splica cu e tardansa tin su motibo.
Durante e trabou di mantencion grandi, a bon confronta cu problema di lekkage. No por yega soluciona e problema aki mesora, ya cu ta papia aki di un edificio monumental. Mester sigui cierto procedura. Pero si e mandatario por a bisa cu e ultimo fase cu mester renoba a haya aprobacion caba.
Aunke cu a cuminsa cu e trabounan aki, pero e no kier a bisa mesora pa ki fecha e trabou lo ta cla. E palabracion inicial ta papia di 50 dia laboral.
