E mayornan ta desespera y a manda carta pa scol pero sin bon resultado. Nan ta busca tur forma pa yega na Minister Endy Croes pa mira kico por haci toch. Cu e cambionan anuncia pa Stichting EPB, ta resulta cu un grupo di nuebe alumno cu mester bay un aña mas pa prepara pa drenta Colegio EPI, a tende di scol cu no a logra haya maestro pa por duna nan les. Te awo, nan lo keda sin scol, aunke dos di nan ta “leerplichtig”.
Un studiante ta “leerplichtig” ora e ta entre 4 y 16 aña di edad. E ley di leerplicht a drenta na vigor na Aruba dia 23 di december 2011. E ta forma parti di e convenio rond di derecho di mucha, den cual ta stipula cu “tur mucha tin derecho riba enseñansa”. Como cu mucha ta menor di edad, ta obliga e mayornan y gobierno pa garantisa cu e mucha ta bay scol.
Pero, den e proceso aki, e obligacion no ta sinta solamente na mayornan, sino tambe na gobierno. Y ora referi na gobierno, ta mira specificamente den direccion di Minister di Enseñansa, cu mester garantisa cu tin scol pa tur mucha na Aruba. Awor esaki no ta e caso y como nuebe mucha a keda na y riba caya, door di un decision di EPB.
