Tabata alrededor di 8:55 pm cu polis a presenta cu urgencia na e compleho di Bushiri p’un problema saliendo fo’i man. Na yegada, polis a topa cu un situacion basta tenso, hopi hende y cu poco polis na e sitio. Na prome instante tabata papia di un problema di pareha y cu e homber a saca cuchiu.
Na sitio a constata cu no a haya cuchiu riba e homber, sinembargo e polisnan mester a wanta un cantidad di insulto. Ora polis a bay pa detene e homber, el a resisti formalmente.
No a keda nada otro di uza forsa bruto cu ne. Ta parce cu e pareha mes no tabatin problema cu su homber, mirando cu ora polis a detene el a core bay su tras ta grita su nomber.
E situacion ta mustra cu mas bien e mayornan no ta acuerdo cu e relacion, mirando cu e yiu tin diesocho aña y e homber mes ta mustra di edad mas avansa.
Na final polis a transporta e homber pa warda di polis, sospecha di a insulta polisnan den ehecucion di nan trabou. Mester bisa cu bayendo cu e homber ainda e chick tabata grita e polisnan pa no bay cu ne.
