Locual ta imposibel pa hende ta posibel pa Dios. Locual ciencia y tecnologia no por compronde, ta solamente Dios tin solucion p’e. Nos mester reconoce cu Dios a traha tur cos y cu Dios por tur cos y cu Dios ta haci tur cos bira posibel. No ta awe ta existi hende incredulo of miho bisa hende cu no ta kere den Dios. Semper nan tabata existi, pero tur momento nos por a ripara con nan a keda boca habri ora poder di Dios manifesta. Nos ta bibando den un tempo caminda hende ta reta Dios, haci cherche di Dios y mas cu tur cos rebeldia contra Dios.
Pero Dios den su misericordia, keto bay ta sigui sana, sigui libera, sigui bendiciona, pasobra e ta Dios, Soberano y Todopoderoso. Dios ta bon, pasobra bondad ta biba den Su curason, Su naturalesa ta di bondad, Su misericordia y Su compasion ta vence tur cos. Semper ora nos bin dilanti di Dios, den oracion, nos por tin e confiansa, cu Dios ta scucha y contesta nos oracion, no ta importa con dificil e situacion por ta. Awe maske bo ta para bo so y tur otro hende, no ta kere, sa cu bo fe den Dios lo pone milager sosode p’asina tur hende den bo cas lo alaba y gradici Dios.
E nivel di materialismo a subi asina tanto, cu hende ta limita Dios, pasobra nan ta kere mucho mas den nan mes forsa cu nan ta kere den Dios. Nunca nos por pone un banda nos oracion, nos ayuno, nos alabansa y semper corda pordona (Marco 11:25), semper nos mester traha tempo pa Dios, esey t’e recursonan spiritual cu Dios a duna nos pa nos por acerca Dios tur momento. E poder di oracion ta surpasa tur cos basta nos tene na cuenta lo siguiente:
Nos Dios ta riba tur cos.
Nos ta sirbido berdadero di Dios. Ningun hende no por sirbi dos Dios.
Dios ta scucha y ta contesta oracion.
Esun cu pone su confiansa den Dios nunca lo pasa berguensa.
E boluntad di Dios semper mester ta na prome luga, pasobra asina nos desvia for di esey nos lo ta pa nos propio cuenta, nos no por negocia cu e boluntad di Dios, nos mester simplemente obedece e boluntad di Dios, e boluntad di Dios mester ta semper na prome luga den nos bida. Ta p’esey Hesus a siña nos haci oracion den Mateo 6:10 bisando: Cu Bo reino bin y cu Bo boluntad sosode na tera mescos cu na shelo. Laga nos no lubida cu ta para scirbi den Lucas 1:37: Pasobra pa Dios lo no ta imposibel.
Daniel a vence cueba di Leon pa medio di oracion. (Daniel 6:21-23)
Elias a baha candela for di shelo pa medio di oracion (1 Reynan 18:36-38).
Rey Ezequias (Isaias 37:36-38) a gana guera pa medio di oracion.
Pedro a lanta Dorcas for di morto pa medio di oracion (Hechonan 9:40).
Hesus tabata haci oracion constantemente y e milagernan a sosode. Hesus a bisa Martha, si bo kere lo bo mira e Gloria di Dios y Hesus a lanta Lazaro for di morto. Tur cos ta posibel ora nos ta kere, pasobra Cristo Hesus a bisa e señalnan aki lo sigui esunnan cu ta kere, pasobra ora nos kere, nos ta demostra fe y confiansa den Esun cu por yuda nos.
Den Isaias 26:3 ta para skirbi: Lo Bo warda den paz perfecto, esun cu su pensamento ta permanece den Bo, pasobra e ta confia den Bo.
Pastoor Marcel Balootje
