Ta un bunita palabra, pasobra hopi biaha nos mester di algo, pero nos no kier, habri nos curason pa e cambio tuma luga. Tin biaha hende grandi ta actua manera mucha chikito, nan mester bebe un remedi pa nan bira bon, pero nan no kier pasobra remedi cu alcohol no ta ruman.
Bijbel ta siña nos y ta para skirbi den 2 Corintionan 5:17: P’esey si un hende ta den Cristo, ta un criatura nobo e ta, e cosnan bieu a pasa caba, ata tur cos a bira nobo.
Esey ta nifica cu tur nos picanan y tur nos debilidad nan Cristo Hesus a tuma encargo di nan pa asina nos por cuminsa un bida nobo den Cristo.
Awor cu Cristo den nos bida ta nifica cu nos no por continua den e bida bieu, pasobra caminda Cristo ta biba, pica, paranda y inmoralidad no por ta biba.
Cristo ta bisa bin manera bo ta, pero bo no por keda manera bo ta, Cristo no ta un decision temporal, e ta un decision eterno, pasobra ora nos tin bida den Cristo Hesus nos ta biba den claridad, pasobra claridad ta Cristo, E ta E luz di mundo, esun cu ta den Cristo no por ta den scuridad.
P’esey e palabra di Dios ta bisa nos den Lucas 21:19:
Door di boso perseverancia,(pasenshi) boso lo gana boso alma.
Ora nos entrega nos bida na Cristo tin un caminda largo pa bay. E ta conoci como e caminda di rechasa pica y biba pa Señor, miho bisa buscando santidad den Señor.
Persevera ta nifica kico cu bini den bo caminda, mantene bo bista riba Cristo.
No keda straño si bo mester perde amistad.
Of por ehempel bo hendenan di cas lanta contra bo.
Colega di trabao no ta saluda bo.
Otro ta bisa cu bo ta husga, djis pasobra bo a reprende e pica cu nan ta haci.
Pasobra no ta tur hende kier wordo coregi, tin hopi hende kier biba den wonderland, sin ley, sin respet, sin orden, yena cu inmoralidad.
No ta tur hende por soporta esunnan cu ta rechasa pica, inmoralidad y bruheria. Pero e gran secreto ta pa sigui stima hende cu e amor di Cristo Hesus y ofrece nan ayudo den nan necesidad, manera ta para skirbi den e buki di Judas 1:20-23.
Hende mester compronde cu bo no por sirbi dos Dios, bo no por come na dos mesa, e asunto aki no ta religiosidad. Pero e ta realidad na cual na final di bo bida sea bo ta drenta cielo of bo ta drenta fierno.
A yega tempo pa hende realisa cu si un hende ta den Cristo, e mester laga e bida bieu, cual ta tur locual tin skirbi den Galationan 5:19-21 y 1 Corintionan 6:9+10 y wak bon kico ta para skirbi na 1 Corintionan 6:11. E ta splica nos claramente cu tur hende tin e oportunidad pa un bida nobo den Cristo.
Salmo 103:3 ta splica cu Dios ta pordona tur pica, kiermen hende no ta obliga pa permanece den un bida di pica.
Cristo Hesus no a bini pa condena ningun hende. Pero ora hende no ta kere den Cristo, ta rechasa Cristo den nan mente y cu nan actitud, nan ta condena nan mes (Juan 3:17+18).
Hesus no a condena e muhe gara den adulterio, pero Hesus a bis’e bay y di awor en adelante no peca mas (Juan 8:1-11).
Tin un gran oportunidad pa tur esunnan cu kier arepenti y aparta for di pica, Cristo Hesus ta brasa habri pa nos tur.
No ta tempo pa biba scuridad (1 Juan 1: 5-7).
Sinceramente,
Pastoor Marcel Balootje.
