Un dia manera awe, dia 3 di october, pero 37 aña pasa, a nace un cabayero cu nos tur conoce awendia na Aruba, como Carlitos La Leyenda. Riba su cumpleaños, nos a pasa dia cun’e y tambe combersa un tiki cun’e Carlitos a bin Aruba na edad di 17 aña y tambe a cuminsa traha na Carlos ‘n Charlies e tempo aya.
Su bida a cambia na 2005, ora cu el a haya un accidente cu a limit’e. Ta pa e motibo ey mes e ta suplica na un y tur pa lucha pa boso soño y keda semper positivo. Pero tambe prepara boso prome bon pa boso futuro, studia, pasobra esey ta hopi importante. Su benta
Tur hende por mira cu Carlitos ta bende su mangelnan, su cukinan riba caya, pero semper bon bisti. E ta conta cu un amigo di dje, a bis’e cu e ta famoso, dicon no bay bende chuculati y aparentemente, el a resulta.
Carlitos tin basta tempo caba ta bendiendo su mercancia y semper tin hende ta cumpra for di dje. E ta un personahe hopi stima den pueblo. Carlitos ta un persona hopi trankilo y e hendenan ta apoy’e, apesar di su limitacion y naturalmente hopi sosten. Con Carlitos ta prepara su mes pa su trabao Prome cu Carlitos bay haci su trabao, e ta prepara for di e anochi anterior cu ayudo di su famia. Su padrastro ta percura pa haci su sapatonan limpi y tambe su mama ta yud’e cu su paña prepara pa e siguiente dia. Carlitos tin hopi disciplina, cual ta un clave importante y tambe su fe y constancia. Su fe Carlitos semper ta papia di fe. E sa cu Dios a mand’e pa e haci un proposito y e ta keda ripiti cu e tin hopi fe.
Kico Carlitos gusta haci E gusta musica masha hopi mes. E gusta musica Latina, Reageton, merengue, bachata, salsa. E gusta tur tipo di musica, hasta Vallenato. E ta comenta cu e Colombianonan ta hopi bon cun’e. Cuminda Carlitos gusta hopi cuminda Italiano, manera pasta Alfredo, apesar cu el a nace na Republica Dominicana. El a comenta cu e restaurantnan ta dun’e bon prijs ora e pasa eybanda. Varios doño, manager, supervisor y e trahadonan di e diferente restaurantnan na Aruba, stim’e masha hopi mes, nan ta manera famia p’e y e stima nan bek y e ta hopi contento pa e trato cu el a ricibi.
Un dama den su bida Na Republica Dominicana Carlitos tin su futuro casa cu yama Luciena Paola y e sa bin Aruba, segun Carlitos ta conta. E tambe sa bay cerca dje y e biaha aki e ta bay na december. E hendenan cu e sa topa Semper Carlitos ta papia di positivo. E sa topa cu hendenan menos positivo tambe. Pero semper e ta confronta nan cu un smile riba su cara.
Carlitos gusta duna conseho na studiantenan cu ta hopi importante pa duna balor, e principio y respet na otro. Esey ta loke ta mas bunita na mundo. Mester ta humilde y respetuoso, cual bo por logra hopi cu esey. Hopi porta ta habri pabo.
