No por culpa aeropuerto directamente. E culpabel ta nos mesun habitantenan cu ta prefera pa ta iresponsabel cu maneho di sushi.
Net dilanti di aeropuerto despues di e parkinglot, tin un area cu ta hopi sushi. Ta papia aki di e ruta cu ta bay pa dump sushi. E truck- of pickupnan cu ta pasa pa bay tira sushi no ta haci esaki na un forma responsabel.
E consecuencia ta cu riba e ruta pa hiba sushi ta yena poco poco cu sushedad, manera saco, of otro materialnan di plastic cu ta keda dorna e cadushi y matanan cu tin riba e ruta.
Aeropuerto tambe a cera completamente acceso pa trahadonan por para auto net despues di e parkinglot. E area aki a bira hopi mahos yen di yerba cu mata mahos y tur e sushi cu ta bula for di vehiculo ta bin cay den e punto ey.
Crusando e caminda tin un parada di bus. Eynan tin un banki pa e usuarionan di bus of autobus por sinta warda. No tin bari y e usuarionan di bus ta djis hisa benta nan boter of bleki bashi patras di e banki. Mester busca manera di haci un limpiesa urgente den e area aki. Miles di turista ta pasa tur dia eynan saliendo for di aeropuerto. E no ta un bunita bista. Kisas aeropuerto of gobierno por activa un ploeg y haci un limpiesa necesario den e zona.
Tambe e mensahe ta bay pa pone un bari na e parada di bus dilanti di aeropuerto. Mesun mensahe kier manda na esnan cu ta hiba sushi pa benta afo, sea mas responsabel y tapa e sushi adecuadamente pa evita cu riba henter e ruta ta keda sushi benta y acumulando causando un mahos bista pa nos isla y su bishitante- y habitantenan.
