Tanto Aruba, Corsou como Boneiro ta na fabor pa habri frontera gradualmente. Prome pa carga maritimo, despues pa yate y boto di placer, despues avion priva y finalmente pa vuelo comercial. Pero, Venezuela tin un otro plan y ta parce cu nan tin masha pura pa habri specialmente frontera aereo cu Aruba. Nan kier p’e aerolinea nacional, Conviasa, cuminsa bula vuelo regular pa Aruba y Corsou, mesora. Nan kier pa habri frontera den un solo tiro y mesora, sino nan no kier nada!
E reunion a tuma luga diamars dia 31 di januari 2023 den Acoya Hotel na Corsou. Nos isla ruman anfitrion di e reunion a presenta cu un delegacion grandi. Aruba tabat’ey cu Departamento di Aviacion Civil, Duana Aruba, Migracion Aruba y mas, na tur como seis ehecutivo a representa Gobierno di Aruba. Di parti di Gobierno Insular di Boneiro tabatin dos representante. Tambe tabatin un delegacion di Gobierno di Hulanda den e reunion.
Pero Venezuela a bin “all out” p’e reunion. A yega cu mas o menos 20 persona den un delegacion pisa. Tabat’ey e consulnan di Willemstad y Oranjestad, e vice-minister di Relacionnan Exterior, Migracion de Republica Bolivariana de Venezuela, Guarda Costa Venezolano, Duana Venezolano y sin lubida e propio Gobernador di Estado Falcon.
E delegacion Venezolano a yega cu un meta, percura pa habri frontera mesora cu e islanan. Claro, nan tin un interes comercial awo y mester di nos islanan pa promove mas biahe entre Venezuela y e islanan. Mester tene cuenta cu Merca mes tin frontera cera cu Venezuela, pues un reapertura cu e islanan, lo haci cu nos lo bira un “hub” p’e Venezolanonan por pasa aki pa bay Merca.
Pa mas lesa TREMPAN.COM.
