“Ta cu sentimento mixto mi ta skirbi e despedida aki como presidente di hunta di directiva pa Fundacion Museo Arubano (F.M.A.). Mi ta orguyoso di por a contribui na e organisacion aki durante e ultimo añanan, pero ta momento pa mi colega dr. Rosabelle Illes, Frank Croes y ami pasa e batuta pa e siguiente directiva. Josette Croes lo lidera e hunta di directiva hunto cu e miembronan nobo”, asina Lincoln “Dello” Gomez, e presidente saliente di FMA, a expresa den su discurso di despedida.
Na momento cu recorda e logronan di F.M.A. durante su mandato, no ta un sorpresa cu e progreso logra pa promove y preserva nos patrimonio cultural. Manera, por ehempel, di traha cu Stichting Monumenten Fonds pa renoba varios edificio icono y converti nan den museo y lansa diferente exhibicion y oportunidad educativo pa hoben y adulto. Museum of Industry, Community Museum y Carnival Euphoria a haya bida bou liderazgo di Dello Gomez na FMA y cada un di nan lo contribui na nan manera na comunidad durante e siguiente añanan.
E hunta, e curator Renwick Heronimo y e director Anky Vrolijk, a traha incansablemente pa por crea varios luga cu contenido cu lo sirbi como backdrop pa e historianan di nos pasado. “Nos a haci e trabou cu amor, aprecio y respet pa nos herencia cultural”, asina Dello Gomez a conta tur presente den e sala.
“Nos a experencia emocion, crecemento y expansion…pero manera historia mes ta bisa y semper lo haci, tambe nos a sinti e menasa y impacto causa pa e pandemia. Un pandemia cu no tabata amabel cu nos financiamento y a hiba nos na tuma diferente decision dificil. E decisionnan cu no tabata popular, sinembargo tabata necesario pa F.M.A. por a resisti e pandemia y e crisis financiero, incluyendo e falta di apoyo financiero di parti di gobierno. Afortunadamente nos por bisa cu nos a yega n’e otro banda. Na diferencia di hopi museo rond mundo cu mester a cera nan porta definitivamente. Ainda nos t’aki!”, Dello Gomez a accentua cu un sonrisa di satisfaccion riba su cara.
Famia Real a bishita Aruba riba dia 30 y 31 di januari 2023. F.M.A. tabatin e oportunidad di ricibi nan den e Museum of Industry, Community Museum y e Museum of History. A comparti cu nan e historia di revolucion industrial y herencia cultural, tambe a presenta e Bonbini Festival caminda por a aprecia nos tradicion di carnaval. FMA ta agradecido p’e honor.
Si mira pa dilanti, F.M.A. ta enfrenta diferente reto y oportunidad nobo. Lo ta necesario pa reestablece e fluho structural di financiamento pa por restaura e operacionnan y financia crecemento. E panorama cultural ta evoluciona constantemente y awo ta mas importante cu nunca pa sigui innova y progresa. Na mes momento no por laga e adultonan mayor y artefactonan pasa pa olvido. Nan tin un storia pa conta y ta nos deber pa documenta y cataloga cada storia. Aruba a sa di demostra bes tra’i bes cu e por move y adapta pa por ta parti di e siguiente ola di innovacion y industria nobo. E proximo hunta di directiva di F.M.A. tin un papel fundamental pa esaki y no tin duda cu nan lo ta na e nivel di e desafio.
“Mi ta probecha e oportunidad aki pa gradici e hunta di directiva di F.M.A., nos director, nos curator, nos socionan, nos siguidonan y na nos personal pa nan dedicacion y trabou intenso durante e añanan, incluyendo e personal cu nos no por a paga mas. Tabata un privilegio pa por a traha den un ekipo asina talentoso y comprometi. Mi tin confiansa cu nan lo sigui logra cosnan grandi den futuro. Di tabata presidente y di a traha cu boso ta un honor y privilegio. Mi ta desea e siguiente hunta hopi exito na momento cu nan asumi e funcion emocionante y esencial aki. F.M.A. tin un futuro briyante su dilanti y mi sa cu e lo sigui causa un impacto positivo na nos patrimonio cultural durante e añanan nos dilanti. E trabou kisas no lo ta facil, pero e resultado ta bale la pena e esfuerso y dedicacion. Esey t’un promesa di mi parti”, asina Dello Gomez a termina bisando.
