E situacion entre gobierno y e sindicatonan representando e trahadonan publico ta keda tenso. E sindicatonan ta keda para fuerte riba nan recorte, pero di un otro banda gobierno ta papia un otro idioma.
Dialuna mainta nan a manda un carta pa Conseho di Minister unda cu nan ta enfatisa di no sigui den negociacion pa loke ta e eliminacion di e entrega di 12.6%.
Den e carta ta mustra cu den e corespondencia anterior, a informa gobierno, cu mirando e hecho cu no ta kita e cortamento den salario di e empleadonan publico cu e 12.6%, lo bay over na traha menos ora na un forma ekivalente n’e cortamento di 12.6%.
P’esaki, e sindicatonan tabata dispuesto si, pa yega na un entendimento cu gobierno den su rol como dunado di trabao con esaki lo ta ehecuta. Den e reunion di dialuna gobierno a informa di no ta bay di acuerdo cu ningun di e proposicionnan di e sindicatonan.
Di nan banda, gobierno ta keda insisti riba nan proposicion, esta e salario ta bay bek na 100^ (eliminando asina e 5%) pero a cambio, e empleadonan publico ta entrega nan 13 dianan di ATV.
Den cuadro di esaki, e sindicatonan SADA, SIMAR, SPA y SEPPA a informa conseho di minister cu nan no ta bay di acuerdo cu e proposicion di gobierno y ta para riba nan posicion cu pa mientras cu e dunado di trabao no ta paga e salarionan 100% y ta insisti pa mantene e recorte cu 12.6%, e trahadonan tambe lo traha na 87.4%.
P’e empleadonan publico, e 22 oranan ta keda acumula pa luna y lo ta tuma manera indica anteriormente pa esunnan den enseñansa lo labora un ora menos pa dia.
Durante un rueda di prensa na sede di SIMAR, e sindicatonan a fiha nan posicion unda cu e dia siguiente, esta diamars, cada un sindicato, den nan seno, ta bay reuni cu nan miembronan pa asina mira ki pasonan ta bay tuma.
Pa un cobertura mas amplio lesa e edicion di TREMPAN di mañan.
