Desde prome dia di Toque de Queda tur cos a bay bon. Te ora cu Diahuebs 15 di Mei a yega unda cos a bruha pasobra e transport di CEA tabata plat y ningun hende a ser informa. E Polisnan a cuminsa trempan cu detencion asina cu 10or di anochi a bati. Na Macuarima a detene dos persona cu a purba huy den auto. Nan tabata cuater den e auto y dos a logra huy drenta mondi. A cuminsa un buskeda pa e otro dosnan mientras cu refuerso tambe tabata na caminda. E dosnan deteni mester a sinta basta rato. Djey na Paradera poco pabou di Pacifico a detene un otro homber burachi riba caminda. Pa nan sorpresa a busca manera di haya transporte di CEA. Despues di basta yama y busca drechi, a bin resulta cu no tabata tin personal di CEA riba dienst. Hasta a manda Polis bay na corte pa mira si nan tey. Tur e vannan tabata tey pero nada di personal.
Esey a haci cu e Polisnan na Santa Cruz mester a manda un patruya paden mesora pa core busca e dogcatcher pa busca e dosnan na Macuarima. Djey a manda e otro patruya di Noord na Shaba pa asina busca e dogcatcher di Shaba pa bay bek te Paradera pa busca e homber deteni. Ora mira con henter e anochi a bay, por bisa cu e comunicacion tabata hopi malo. Ningun hende a avisa Polis cu CEA no ta traha Diahuebs anochi. E supuesto palabracion ta cu CEA lo traha pa yuda Polis. E realidad ta cu e cantidad di detencionnan pa TdQ a baha drasticamente. Tabata tin dia e siman aki sin detencion. Kizas pesey a stop e personal di CEA pero no a avisa pa Polis ta prepara.
