Un caso basta serio di negligencia tumando luga cu un criatura hopi chikito. Den ora di anochi e mucha aki tabata cera den auto, cu glas di bentana riba un nachi y ta yora mientras su mayor tabata den casino ta hunga.
Polis a presenta na un casino den area di Palm Beach/Eagle Beach pa asina constata cu nan mes un wowo con un criatura tabata su so den auto ta yora di miedo y mas sigur di hamber tambe. No tin idea di cuanto ora e pober mucha lo tabatin e momento ey den e auto.
Esaki a tuma luga den careda di 8:00 pm ora cu e patruya a yega e sitio. Segun por a compronde cu esaki no ta e prome biaha tampoco. A tuma contacto cu slachtofferhulp pa asina tuma carga di e mucha cu tabata hopi intrankil.
Den casino a informa cu polis ta buscando e mayor(nan) di e criatura den auto y no a tarda mucho cu e tata a presenta. Polis a dun’e un scual formal como cu no ta prome biaha cu ta bin atende cu ne pa esaki.
No obstante cu el a presenta, no a entrega e mucha mas na e tata, nan a transport’e pa warda di Shaba pero prome cu esey a busca algo di come pa e pober criatura. E tata a bandona sitio den e Chevrolet Spark Shinishi cu e mucha tabata aden.
