Diabierna mainta esunnan campando den area di Eagle Beach como tambe e turistanan cu tabata disfrutando di e lama, a tuma nota di un cantidad grandi di jellyfish rond di e costa. Nos redaccion a haya varios imagen y potret di hende atento cu a informa nos mesora riba esaki.
Ta papia aki di un cantidad masha grandi mes di e bestianan di lama aki cual a sorprende algun di esunnan cu tin varios decada ta campa den e area. “Nunca mi a yega di wak esaki, prome biaha,” un campado ta conta nos. Otronan ta bisa cu semper tabata custumbra di mira aki aya e tortuganan, pero nunca jellyfish, y sigur nunca di e escala aki.
Un combinacion di coriente di lama y biento fuerte, y tambe con e jellyfish no ta realmente un bestia cu por landa, nan ta haya nan mes pusha pa lama den e forma aki segun expertonan internacional unda esaki sa sosode varios biaha. Adicionalmente, e jellyfish ta depende di e movecion di ola, dus nan no tin mucho control tampoco unda nan por yega of pa evita subi tera.
