Minister di Naturalesa, Ursell Arends a duna di conoce diahuebs mainta cu e insinerado riba tereno di Parkietenbos lo keda eynan y den funcionamento temporalmente. Tambe a descarta cu lo busca un di dos of otro tipo di insinerado. E mandatario a ratifica cu e uzo nobo di e area lo ta como parke solar.
E informacionnan aki Minister Arends a divulga como parti di su contesta na periodista di Bon Dia Aruba tocante kico ta para di e operacion di insinerado riba Parkietenbos. Esaki ta mara na e proyecto di RWZI ya cu ta uza e insinerado pa kima e sludge cu ta keda atras despues di a procesa e awanan sushi cu ta deposita na Bubaliplas. “E insinerado tin un funcion pa haci temporalmente tanten cu no tin un RWZI nobo,” e minister a bisa.
Un bes cu e privatisacion di RWZI bira un realidad, parti di e plan ey ta pa instala un asina yama biodigestor na e planta aki cu e tarea di procesa dicho sludge na e sitio mes. Tambe e insinerado tin e tarea pa procesa otro tipo di desperdicio cu actualmente no tin otro solucion pa nan. E mandatario no a specifica ki tipo di desperdicio,ni tampoco ki dia lo saca e insinerado for di operacion.
Loke si e titular di naturalesa a ratifica ta cu dia 31 di december ta e ultimo dia cu dump di Parkietenbos ta habri pa publico. “Ora aña habri, conhuntamente cu e trahadonan di Parkietenbos y Serlimar cu ta eynan na e momentonan aki, lo cuminsa prepara y remedia e area y dune otro destinacion,” Arends a declara.
Segun e mandatario, esaki tambe ta un proceso cu lo tuma su tempo, di cual lo comunica mas despues. E siguiente uzo di e tereno grandi aki lo ta como un parke solar. “Segun e indicacionnan cu nos tin, por ubica mas di 16 mil panel solar cu lo produci coriente pa Aruba.”
