No tin claridad si lo extende e contract di Excelsior Casino, segun abogado di FTA Hose Figaroa. Esey a hiba na simannan largo di tension bao di e trahadonan, como cu nan no tabata sa kico ta nan futuro. Algun tempo pasa FTA a drenta bek, despues di hopi aña den Excelsior.
No tabatin mucho claridad pa loke ta negociacion di un CAO, como cu no tabata sigur kico ta e futuro di e operador na e momento ey. Loke cu a compronde, aunke no oficialmente, como cu e reunion cu mester a tuma luga diabierna, a wordo wanta un rato door di abogado di Excelsior.
Tin di compronde si cu e operador lo a haya un extension. A base di esey, E intension ta pa FTA firma un protocol cu nan, pa asina cuminsa negociacion, y pa regla algun cos di awo caba pa loke ta beneficio di e trahadonan.
Hopi detaye, Figaroa no tabata tin, como cu e reunion no a tuma luga. Mester warda un rato kico lo bay sali afo di loke oficialmente lo mester wordo informa pa loke ta e extension eynan.
Kico FTA kier
E meta ta, cu aunke no tin mucho claridad tampoco, pa cuanto tempo e extension bay. Ta depende di e tempo, e ora por bisa kico tur nan lo bay busca, como cu si ta un extension relativamente cortico, compara si ta papia di un extension di mas tempo.
Pa FTA no ta mucho cla ainda pa bisa kico e meta lo bay ta.
Cos ta malo of no
FTA tin entendi cu lo bay bin cierto cambio. Lo bay bin cierto renobacionnan na e hotel. Esaki automaticamente lo tin consecuencianan pa e casino tambe. Locual cu tin di compronde for di e operadornan di e hotel mes, of en todo caso for di nan abogado ta, cu e trabao di e trahadonan ta sigura, no importa kico pasa.
E trahadonan lo sigui, no mas bao di kende como operador, no tabata mucho cla. Awor aki ta pendiente. E ta dificil pa bisa algo, pasobra no tin confirmacion totalmente di kico ta e palabracionnan entre e operador di hotel y e operador di e casino.
Con pa evita ripiticion di Aura Casino
Tur hende sa di e experiencia di Aura Casino. FTA conoce e wega miho cu ningun hende. Segun Figaroa, palabracionnan ta algo cu parcialmente bo por logra cu e operadornan mes of cu e doñonan di e licencia. Pesey tabata tin algun combersacion cu gobierno, den e caso aki cu minister di labor, den cual en todo caso, kier a yega na palabracionnan mas fiho, kico ta e condicionnan na momento, cu como doño di e licencia, bo ta bay busca un operador.
Na fin di dia, esun cu ta opera, den algun caso, doño di e licencia no ta esun cu ta opera e casino.
FTA ta sinti cu pa loke ta e doño di e licencia, tambe mester tin cierto obligacion pa loke ta e trahadornan.
Esey ta algo cu no ta regla cu e operadornan mes, sino tin cu bay un tiki mas halto, sino esun cu ta duna e licencia, cual ta gobierno.
Ta papiando awor aki cu Gobierno riba esey, pa un di e condicionnan pa na momento cu ta duna un licencia di casino ta, cu esun cu tin e licencia, mester tin cierto responsabilidad pa loke ta e eventual trahadornan.
Sea cu ta directamente cun’e, of via un operador independiente, segun Hose Figaroa.
