Den 2017, Dimas a nenga permiso. Na momento cu haya un aplicacion, e aplicacion mester cumpli cu cierto rekisitonan. Ta toets in e maneho di gobierno y e ley. Esey ta e hermentnan cu tin pa traha cun’e, segun director di Dimas, Kathy Paskel.
Den caso di 2017, no tin tur cifra cla, pero si sa cu na diferente momento den 2017, e negacion tabata core rond di un 13%. Un persona cu haya un negacion ta haya un beschikking, unda cu ta splik’e, e motibo pakico no a yega na un decision positivo p’e. Cu e decision aki, e ta haya e derecho pa haci un apelacion. Den e apelacion e por trece argumentonan nobo, of unda cu Dimas lo bay considera si tin motibonan valido pa haci un revision den bezwaar. Of e por tin maneho nobo cu Dimas lo bay bolbe toets e mesun peticion eynan pa wak si awor aki si e ta cumpli, mirando e cambio di maneho.
Tur esakinan ta peticionnan cu Dimas ta deal cun’e. E cantidad di bezwaar den 2017 tabata basta halto. Tabata conta riba mas di 100 bezwaar pa luna. Hendenan cu no ta di acuerdo cu un of otro decision. Den 2017 tabata tin mas di 14 mil peticion. Dimas tambe ta atence cu bezwaarschriften di negacion di visa. Na momento cu embahada haci un negacion pa un peticion di visa, e persona no ta di acuerdo, e por apela y esaki ta sosode na Dimas, pero tambe na momento cu bo tin companianan cu a haya un boet pa actua en pugna cu ley di LTUV y no ta di acuerdo cu e beschikking di gobierno, e por apela esaki na Dimas.
Tin diferente motibo cu un persona por apela. Por ehempel tambe por trek in un permiso di un hende cu lo wordo expulsa di Aruba. Of si tin otro motibonan. Tur esakinan e beschikkingnan hende mag di bay den bezwaar contra dje y Dimas lo trata nan.
Motibonan di trek in
Motibonan a base di cual por hala aden un permiso, ta poni y stipula pa ley. Un di nan ta cu si bo tabata cera pa un delito pa mas cu 3 luna, esaki por ta un motibo pa cual bo ta trek e permiso in. Asina tin otro motibonan tambe. Tur e motibonan aki, tur ta defini pa ley y tin un proceso di hoor en wederhoor cu ta sigui na momento cu bo trek in cierto permisonan.
Maneho di stranheria
Segun Kathy Paskel di Dimas, maneho di stranheria ta wordo stipula pa e autoridad encarga, cu ta e minister, esta gobierno. Na momento cu tin cambio di gobierno, hopi biaha ta bin tambe paralelo e revision pa wak cua partinan di e maneho bo ta bay continua cun’e y cuanan lo bo revisa y pakico.
Den e fase eynan tambe ta actualmente, dunando e sosten den forma di werkgroep na e minister actual, unda cu e ta compilando tur locual cu ta necesario na informacion. No solamente pa wak for di kico lo por bay hiba como maneho di stranheria, pero mas amplio pa wak ‘e na un manera mas holistico, ki populatiebeleid lo hiba como Aruba y ki desaroyo bo ta desea, tanto social economicamente y asina pa wak con bo por uza e parti di migracion como maneho pa alcansa e metanan ey cu bo tin.
Responsalibidad na minister
Dimas ta resorta bao di minister di husticia y integracion, mr. Andin Bikker. E ministerio mes, ta pendiente pa wordo formalisa por medio di e landsverordening instelling ministeries, segun Kathy Paskel.
