Minister di Husticia, Andin Bikker, no tin un idea si Gerald Fingal di IASA a bay cas. E no sa si e ta malo of no, pero cu e sa, cu e no a wordo manda cas. Pa loke ta Trudy Hassell, a presenta un situacion dos siman pasa. E minister anterior a apodera dos persona, un di KPA, sra. Comisario Gordon y tambe sr. Blijden, pa nan por firma e decreto pa loke ta e Landsverordening Toelating en Uitzetting, pa Warda nos Costa, den nomber di minister di husticia. A presenta un situacion cu ambos no tabata disponibel.
Un di nan sr. Blijden, mester a bay guia un persona cu mester a wordo expulsa y for di eynan no tabata disponibel mas temporalmente y sra. Gordon tabata cu vakantie.
A bin un vacuum cu riba un diasabra dos siman pasa mester a apodera un persona e ora y a dicidi e ora pa apodera sra. Trudy Hassell. Actualmente Hassell ta un apoderado den nomber di minister di husticia pa cumpli cu e tareanan cu normalmente diariamente sr. Blijden tabata haci, door di ausencia di dje y sra. Gordon. E minister a enfatisa cu sr. Fingal no a mand’e cas. E ta den su posicion.
Cambionan
Awor aki ta bezig cu Imigracion Aruba. Ta un proceso cu Bikker a hereda, cual ta e decreto caminda cu ta institui un dienst nobo, den un fase cu na momento cu el a bira minister, e diferente sindicatonan a expresa cu nan no a wordo debidamente consulta riba e decreto aki, cu ta den formacion e tempo ey y ainda ta. A bay den un fase pa nombra un taskforce y ta evaluando hunto cu e sindicatonan, kico ta e miho manera pa yega na un dienst cu tin un dragvlak mas amplio cu ta posibel. Den e caso aki e lo bira un fusion di tanto IASA y Warda nos Costa. E proceso eynan no a finalisa te ainda. Ta den pleno evaluacion, conhuntamente cu e sindicatonan. Ora cu ta asina leu si tin decisionnan cu tin cu tuma, lo anuncia esaki debidamente.
