Directiva di Cruz Cora Aruba (Rode Kruis Aruba) a tuma nota di e ultimo desaroyonan encuanto Carnaval y ta comunica na comunidad di Aruba riba locual cu ta tumando luga. Na ningun momento SMAC a acerca Cruz Cora Aruba pa un oferta pa cubri Carnaval 2023, algo cu den e ultimo añanan semper a pasa.
Mirando cu Cruz Cora Aruba ya tin mas cu 50 aña caba brindando su servicio cu boluntarionan certifica y material amplio na tur presente, den e diferente evento, directiva a acerca Presidente di SMAC, Darren van Ommeren, pa sinta na mesa y esaki lo tuma luga na principio di otro siman.
Cruz Cora Aruba ta preocupa pa siguridad y salud di tur participante y publico na banda. Semper a yega na un bon acuerdo cu antes SAC y tambe desde cu SMAC a tuma over.
Cruz Cora Aruba a compronde for di SMAC cu ya caba SMAC a cera un contract cu otro organisacion pa cubri parada di Fakkel. Esaki sin considera of acerca Cruz Cora Aruba, locual ta di lamenta.
Cruz Cora Aruba semper t’ey pa nos Carnavalistanan y nos pueblo durante celebracion di Carnaval y ta spera cu SMAC considera e siguridad total di Carnaval. Ta un trabou hopi grandi y serio unda cu Cruz Cora Aruba ta pone entre 40-50 boluntario riba pia pa cada parada, cu ta capacita pa duna prome auxilio, CPR cu profesionalismo.
Esaki vooral pa e publico na banda y tambe su team cu ta cana hunto cu e gruponan pa cualkier emergencia. Cruz Cora Aruba ta keda pendiente di e reunion otro siman y lo comunica e resultado di esaki na su debido tempo.
Tambe kier desea tur hende un dushi weekend di parada di Fakkel y recorda cada persona pa zorg pa su siguridad, bebe suficiente awa, uza earplugs y no lubida tuma remedi prome cu sali di cas.
