Den e parti di tratamento pa salud mental, tin hopi diagnostico psikiatrico. Bo tin por ehempel depresion, schizofrenia, problema di personalidad, hendenan cu ta uza substancianan manera droga of alcohol.
Den e cifranan conoci mundialmente, den depresion e risico pa trata di comete suicidio ta 20% mas grandi cu cerca otro malesa den e poblacion generalmente. Trastorno bipolar tambe ta manera un 15 biaha mas grandi cu den poblacion general, y hendenan cu ta uza substancia tambe tin un porcentahe di 10% di chens mas grandi cu nan lo trata di comete suicidio.
Den e sentido ey ta depende di cual di e malesanan aki ta papiando di dje, ta haya sa ki tratamento por duna. Depresion leve por trata cu ‘cognitive behaviour therapy’ cerca un psicologo.
Hopi biaha Stichting Hunto caba ta suficiente pa atende cu un depresion mas leve, compara cu uno severo cu lo rekeri remedi y psicologo. Un psicologo normalmente no ta suficiente den e caso mas severo segun Nathalie Kingsale, psychiater di Respaldo.
Pa loke ta schizofrenia, esaki ta un diagnostico cu ta keda trata cu ayudo di un psikiatra pasobra e ta un diagnostico cu hopi biaha realmente mester remedi pa trat’e. “Dus tin manera problema di trastorno di personalidad, tambe psicologico y psikiatrico cu tin di wak pasobra tin biaha bo no por trata e trastorno, pero bo por trata e sintomanan si,” segun Kingsale. Si e pashent tin sintoma di depresion por duna un remedi contra depresion, si nan tin otro sintoma ta analisa pa mira ki otro remedi lo por duna.
