Colega den Cuerpo Policial Aruba, Rodney Solognier, presidente tambe di sindicato di polis (SPA) tabata envolvi den un accidente di trafico basta serio diamars mainta.
Altocomisario interino, Robert Candelara a indica cu su coleganan a bay hospital hunto cu algun amistad y familiarnan pa haya mas informacion di kico a sosode. A opera Rodney den urgencia y e ta interna den ICU y ta meymey di su familiarnan y sernan keri. E peticion cu dokter a haci ta pa purba coopera cu nan, crea un tiki espacio, pa no tur hende bay hospital of yama. Pa asina den tur trankilidad e dokternan por haci nan trabao y famia por tin su debido espacio.
Candelaria a sigui bisa cu e investigacion manera tur otro lo tuma luga, pa KPA semper ta importante pa esaki tuma luga, di un manera profesional y mas rapido posibel pa haya claridad di kico por a pasa. “Pero pa nos lo mas importante y pa tur partidonan envolvi ta con ta bayendo cu nan. Pa nos ta sumamente importante y primordial cu nan salud ta bon, cu nan ta stabiel y cu nan tin tur loke nan tin mester. Esey ta loke hunto cu tur otro colega a bay hospital pa wak con por aporta na dje den momentonan aki.”
Directiva lo tin cu reuni y dialoga riba algun decisionnan na e momentonan aki, y di banda di KPA ta desea Rodney y su famia, SPA y tur colega hopi forsa. “Laga nos keda positivo y yama riba bon Dios pa percura cu Rodney por sana pa pronto e ta bek aki hunto cu nos.”
Te asina leu, declaracion di Altocomisario interino, Robert Candelaria.
