Den un conferencia di prensa e organisacion di musico y artistanan Aruba Entertainment a papia di e ultimo desaroyonan den nan sector y nan reunionnan cu Crisis Team. E vocero di e organisacion aki Albert Vrolijk, conoci como Dj 101. E tabata compaña tambe Ofo Escudero
Nan a haya e informacion cu Crisis Team a pone codigo blauw y esaki ta nifica cu nan por toca den un establecimento cu un grupo di cinco persona. Te cu recientemente nan por a “perform” cu solamente tres persona.
Mirando e cambio introduci, ta pidi pueblo yuda nan den nan trabou door di respeta e reglanan di protocol di uzo di tapaboca, mantene distancia y labamento di man. Ta permiti pa mas persona sinta hunto na mesa y hustamente esey ta e motibo pakico nan ta pidi pa sigui respeta e reglanan di DVG.
“Nos a dal un stap dilanti. E no ta e forma con nos kier pa e ta, pero e ta un adelanto. P’esey ta pidi cooperacion di miembronan di Aruba Entertainment pa cumplimento di e reglanan,” Vrolijk a bisa den e conferencia di prensa.
El a pidi cooperacion di tur hende, publico tambe, pa coopera pa no mester dal un stap atras, y perde nan trabou. “Nos pan y futuro ta depende di e pueblo y p’esey ta pidi nan respeta e protocol.” E musiconan tambe mester ta consciente cu asina mira cu tin violacion di e protocol, mester para e musica.
