Muchanan di YMCA tabata invitado special na The Movies @ Principal

No mas cu algun siman pasa MetaCorp a percura pa apertura di The Movies @ Principal na San Nicolas. Den cuadro di preparacionnan andando pa celebracion di 100 aña di MetaCorp, a invita YMCA pa mira un pelicula cu nan muchanan den e dianan aki di vakantie. E vakantiekamp di YMCA tin como tema Hollywood y a pensa cu pelicula ta pas den nan eventonan. The Movies @ Principal a invita e muchanan pa mira pelicula, haya popcorn, refresco y un regalito relaciona cu e pelicula di momento “The Lion King”.

Shanyce Rovelet, lider na YMCA, a indica cu un total di 75 mucha di YMCA San Nicolas a bay mira The Lion King na The Movies @ Principal.

 

Tanto e lidernan como e muchanan tabatin palabra di gradicimento na The Movies @ Principal pa e gesto aki. Muchanan di YMCA na Dakota tambe a bay mira pelicula, pero na The Movies @ Renaissance, unda tambe nan a pasa un rato hopi agradabel.

San Nicolas orguyoso

Desde apertura di The Movies @ Principal na San Nicolas, tur dia e salanan ta yen. Publico amante di pelicula no ta sconde nan orguyo y satsifaccion di por mira bon pelicula cerca di cas mes, den un sala di e mesun calidad cu esunnan pabou di brug. E hecho cu por disfruta di e area di consecion si bay mira pelicula of tambe si djis pasa eybanda mes, tambe ta haci cu e area ta bon bishita den oranan di anochi.

E prome negoshi di MetaCorp tabata cine

MetaCorp a nace for di aña 1920 cu e negoshi di cine, e tempo ey E. de Veer Chain Theatres, cu tabata den cura di unda awendia ta Censo y Registro Civil den Schoolstraat. Na dado momento e compania tabata maneha 9 diferente teatro tur rond di Aruba.

MetaCorp e ultimo lunanan a inverti den renobacion y ampliacon di su 6 salanan na The Movies @ Renaissance Aruba, mientras cu a crea tambe awor The Movies @ Principal na San Nicolas. Mientrastanto construccion ta bayendo den full swing pa e proyecto di IMAX situa riba Sasakiweg na Eagle, programa pa habri den e prome kwartaal di otro aña.