E blackout di dia 9 di juni ultimo y e dosnan di awe, tur ta pa e mesun motibo: Fayo den e motor nobo Recip 4 cu algun siman pasa a drenta den funcion. Pa un motibo of otro WEB ta confronta basta problema cu e motor nobo aki, cu na dado momento a faya y a ranca henter e planta bin abou den marduga. Ta prome biaha den historia, segun WEB. cu ta experencia un blackout den pleno marduga, ora cu e demanda ta na e punto di mas abou.
Pa awor, ta cuestion di investiga kico a sosode y purba evita ripiticion. Director di WEB, ing. Alfredo Koolman, a sigura cu tipo di fayo asina por sosode na momento cu tin transicion di un sistema anticua di bapor pa motornan Recip moderno. Pasobra ta haciendo e transicion cu e planta operacional, pues cualkier fayo den comunicacion entre e dos sistemanan aki, por causa loke a sosode na dos ocacion caba. Lo investiga bon unda e asunto a bay robes y haci coreccion mesora.
Locual e director a admiti ta cu e mesun motor aki a duna WEB problema caba na juni, cu a causa e blackout. A pensa cu a corigi e fayo y cu e lo no ripiti, pero awe atrobe a bolbe presenta un situacion cu e consecuencia conoci. Riba e pregunta dicon no a logra isola e problema na un sector so, cu a laga e planta bay down completamente, el a splica cu esey ta precisamente locual ta investiga pa evita ripiticion den futuro.
Pa un cobertura completo di e conferencia di prensa di WEB di awe, lesa e edicion di TREMPAN di mañan.
