Riba 29 di september, 2023, despues di cuater aña di esfuerso y dedicacion, Monica Robles por a ricibi su diploma na Universidad di Aruba. Awo su titulo oficial ta “Meester in de Rechten”.
Tabata añanan di reto, “pero na mes momento hopi interesante y valioso.” Loke por a scucha di Monica tabata cu e estudio no solamente a siñe aspectonan di ley pero a siñ’e compronde hopi cos mas. Asina el a bisa cu danki na e estudio di ley, el a desaroya hopi habilidad pa compronde ley y compronde aspectonan legal. Pero loke, por sinti den su palabranan cu ta dun’e hopi mas satisfaccion, tabata pa haya un bista con ley ta influencia sociedad y derecho di cada persona.
Tur e puntonan menciona, tabata e base pa awe e ta sinti su mes capacita pa eherce trabou como hurista.
Studia ley tabata un decision facil p’e, si mira cu semper el a sinti un pasion pa husticia, pa para pa derecho di esunnan den e sociedad. “Durante mi estudio mi a ripara cu bo no mester ta un abogado pa por uza bo conocemento y yuda un otro persona. Y esey ta loke mas mi a gusta pasobra na mes momento cu mi tabata siña mi por a pone mi conocemento den practica, di biaha.”
Awo, den e siguiente fase aki di su bida y danki na e titulo, e por ocupa diferente funcion. “Mi kier analisa hopi bon cual ta e siguiente paso y sigur mi lo scoge un trabou cu mas ta apasiona mi pa por inicia mi carera pa sigui crece y aporta na nos comunidad.”
