Den Juwana Morto Complex, Accion di Bario e siman aki tabatin un significado adicional. Pa Prome Minister Mike Eman, bolbe den e bario no tabata solamente un oportunidad pa scucha habitantenan y mira e trabou cu diferente instancia ta haciendo, pero tambe pa bolbe na un luga cu ta carga un parti di su propio trayectoria den servicio publico.
Eman a recorda e proceso di renobacion cu Juwana Morto a pasa aden añanan atras. Durante e recorido, algun residente a mustr’e potret di e tempo cu Reina Beatrix a bishita e complex despues di su renobacion. Pa Prome Minister, e recuerdo ey a conecta pasado cu presente, pero specialmente cu e responsabilidad pa no laga e trabou den comunidad para.
E bishita a tuma luga hunto cu Minister Rene Herdé y Minister Wendrick Cicilia, ademas di diferente instancia y organisacionnan cu ta participa den Accion di Bario. E presencia di e tres mandatarionan a trece tambe un otro elemento dilanti: continuidad entre generacionnan den e compromiso pa keda cerca di comunidad.
Prome Minister Eman a expresa cu, den e momento di transicion actual, e ta considera importante pa e generacion nobo di dirigente no solamente asumi responsabilidad, pero tambe sinti y comprende e compromiso cu tin cu bario y cu ciudadano. El a describi e recorido hunto cu Cicilia como un forma di traspasa responsabilidad pa e trabou den bario por continua.
Den e sentido ey, e bishita ta conecta discretamente cu e idea di “Era di Relevo” cu ta tumando forma dentro di partido: un relevo cu, den e vision expresa pa Eman, no ta trata solamente di liderazgo, pero tambe di pasa experiencia, responsabilidad y e disposicion pa sirbi pueblo na un siguiente generacion.
Minister Rene Herdé a enfoca su aporte riba loke ainda mester haci concretamente na Juwana Morto Complex. El a señala diferente aspecto di e complex cu, segun e, durante e ultimo añanan no a haya e atencion necesario, entre nan mantenemento di casnan, riolering, iluminacion y cuido di espacio publico.
Pa Herdé, habitantenan merece un bario den bon condicion y cu un bon calidad di bida. El a expresa e compromiso pa, hunto cu FCCA, sigui traha riba renobacion di e complex y atende e puntonan cu mester mehora.
“Nos hendenan merece un bon bario”, tabata e mensahe clave di Herdé, conectando e trabou na Juwana Morto cu e esfuerso mas amplio pa mehora calidad di bida den bario na diferente parti di Aruba.
Minister Wendrick Cicilia, na su turno, a pone enfasis riba e manera di gobernacion cu Accion di Bario ta representa. Segun Cicilia, e iniciativa ta permiti dirigentenan no solamente bishita un bario, pero realmente comparti cu habitantenan, scucha nan preocupacionnan y trece diferente departamento hunto pa atende situacionnan den comunidad.
Cicilia a describi Accion di Bario como un ehempel cu Prome Minister Eman a mustra di con Gobierno por traha memey di comunidad, cerca di ciudadano y hunto cu ciudadano. El a expresa tambe su compromiso pa e iniciativa sigui.
E imagen di Eman, Herdé y Cicilia hunto na Yuwana Morto ta refleha asina dos cos na mes momento: e trabou concreto cu ainda tin dilanti den bario y e importancia di continuidad.
Pa Eman, esey ta parti di e legado cu mester pasa dilanti: cu generacionnan por cambia, pero e compromiso pa sali den bario, scucha pueblo y sirbi comunidad mester continua.
