Resientemente tim di maneho i gabinete di Ministerio di Enseñansa, Siensia, Kultura i Deporte a reuní durante un dia di estudio na Emaus.
Meta di e reunion aki tabata pa buska strategianan pa konhuntamente mehorá e kalidat di servisio interno i eksterno di e ministerio.
E mainta a kuminsá ku un mini body work-out di Minister Marilyn Alcalá-Wallé, siguí pa presentashonnan di kada sektor di e ministerio e.o; gabinete di Minister, UNESCO Curaçao, Uitvoeringsorganisatie Onderwijs & Wetenschap, Maneho, Dienst Openbare Scholen, Uitvoeringsorganisatie Cultuur & Sport. Durante e presentashonnan a hasi interkambio di konosementu denter e ministerio.
Diferente tópiko a bini dilanti manera struktura, ekspektativanan, direkshon di kada sektor, vishonnan, komponentenan pa engrandesé konfiansa propio, konfiansa den tim, efektividat di kada sektor, plannan di maneho, manehonan ku tin ku wòrdu adaptá, defisiensiá den ministerio, posibel solushonnan i strukturanan nobo i strategianan pa mehorá komunikashon, sinkronisashon i trahamentu huntu.
