Crecemento nominal y real no ta mescos y esey ta un preocupacion cu Minister di Asuntonan Economico tin, pasobra e ta afecta e nivel di bestaansminimum.
Manera ta conoci, e salario minimo na Aruba ta 1893 florin. Esaki ta nifica pa un cas di famia di mama, tata y dos yiu (si ambos mayor ta traha) ta 3786 florin. Esaki mientras cu e bestaansminimum ta 5364 florin. Un calculo lihe ta mustra cu tin un deficit di 1578 florin. Pues casi un salario minimo di diferencia den entrada pa un famia di cuater persona.
Y e calculo di bestaansminimum hopi biaha no ta real, pasobra no ta tur caminda e prijsnan ta mescos.
A papia e tema cu Minister di Asuntonan Economico Geoffrey Wever, cu su Ministerio ta encarga cu control di prijsnan.
Tur e evaluacion aki ta basa riba e analisis di e economia di Aruba den su totalidad, segun e mandatario a splica. Si mira cifranan, tin un crecemento economico tur aña. E GDP ta crece tur aña bon. Ta calcula cu pa fin di e aña’ki e ta 6.5 biyon florin y pa 2024 e lo 6.8 biyon florin. Esaki ta hopi mas grandi cu 2019, cu ta e aña net prome cu pandemia.
E problema ta sinta den e diferencia entre e crecemento nominal y esun real. Mester kita e aumento di prijs, e parti di inflacion, y eynan ta nota cu e crecemento no ta manera cu ta pensa. Esaki ta encera, e mandatario a splica, cu e modelo economico di Aruba, cu ta basa riba turismo, mester amplia. Mester tin otro tipo di entrada y busca un modelo unda cu e rikesa ta yega mas cerca di e ciudadanonan.
Pa un relato amplio lesa TREMPAN.
