Mateo 24;13 ta para skirbi: “Y e evangelio di e reino lo ta predica den henter mundo, como un testimonio na tur nacion y e ora ey e fin lo yega. Ta boluntad di Dios pa tur hende arepenti y ta salba y pa ningun hende bay perdi, p’esey El a manda Su unico yiu pa ken cu kere den dj’E no bay perdi ma tin bida eterna.”
Ta nos deber pa predica e evangelio constantemente y awo mas cu nunca cu nos ta mira e situacion mundial, pasobra e dia y e ora ningun hende no sa, awel mas hende nos por alcansa cu e evangelio di reino di Dios, mas contento nos Dios lo ta.
Pero tin biyones di hende cu no kier tende e evangelio di Dios, tin gobierno a prohibi predicamento di evangelio den nan pais, tin hasta a prohibi entrada di bijbel den nan pais.
Tin miyones cu doctrina robes den cual Cristo Hesus no ta na prome luga.
Pasobra Cristo Hesus t’e unico Mediador entre Dios y hende.
Y tin parti di mundo cu te ainda no ta kere cu Cristo a bin na mundo, biba y muri na cruz pa nos picanan, lanta despues di tres dia for di morto, a subi na shelo y E ta sinta na man drechi di e Tata.
Y tin pais caminda ta predica e evangelio, pero hende ta nenga e oportunidad, ta rechasa of haci bofon di Cristo Hesus enbes di acepta e oportunidad pa salbacion.
E plan di salbacion cu Dios solamente por ofrece n’e mundo aki pa medio di su palabra, pa medio di su evangelio, t’e unico manera pa nos por tin un relacion berdadero cu Dios, pasobra evangelio no ta religion, e ta poder di Dios pa salbacion pa tur cu ta kere. (Romanonan 1:16).
Ken cu invoca e nomber di Señor lo ta salba. (Romanonan 10;13). Esaki ta nifica cu e evangelio di Dios, no ta discrimina ningun hende, cu no tin asunto di racismo den evangelio y cu tu hende ta bon bini. (Mateo 11:28).
Hende no ta bay fierno pa motibo di pica, pasobra den Salmo 103:3 ta para skirbi: “Kende ta pordona tur bo inhusticianan, kende ta cura tur bo malesanan.
Laga nos tene bon cuenta cu hende ta bay fierno ora nan no arepenti di nan picanan y a rechasa Dios su plan perfecto di salbacion.
Ta para skirbi den Lucas 10:16: “Esun cu tende na boso ta tende na Mi y esun cu rechasa boso, ta Ami e ta rechasa y esun cu rechasa Mi ta rechasa Esun cu a mandami.”
Wak bo con malicia di mundo ta avansa cu aprobacion legal, den cual nos ta mira con hende dia pa dia na cantidad ta sali pa dilanti manifestando nan rechaso contra e Principio, Boluntad y Palabra di Dios.
Nan mes ta nombra nan generacion, cambia nan nomber y hasta awo nan ta haci cambio na nan curpa fisico y no kier reconoce y ta rechasa e forma cu Dios a creanan den Su imagen y semehansa.
Den 1 Timoteo 2:4 ta para skirbi: “Kende ta desea pa tur hende ta salba y yega n’e conocemento di e berdad. Pasobra ta un Dios so tin tin y un mediador tambe entre Dios y hende, e hende Cristo Hesus.”
No tin salbacion den ningun otro, pasobra no tin bao di shelo, ningun otro nomber cu a duna na hende pa medio di cual nos mester ta salba. (Hechonan 4:12).
Pastoor Marcel Balootje.
