Den luna di mei mr. Milly Schwengle a informa Prome Minister di Aruba cu su persona ta retira como representante di Aruba den Raad van State. E funcion aki el a hacie pa seis aña y awo desde prome di november e no ta eherce e funcion ey mas. Ainda no tin un persona cu a tuma over e posicion di Consehero di Estado di Reino pa Aruba.
Un candidato nombra p’e posicion di Consehero di Estado di Reino pa Aruba ta Rendolf “Andy” Lee. El a forma parti di partido AVP y tabata presidente di Parlamento di Aruba. Tambe Lee tabata Minister Plenipotenciario na Washington. Si tin mas persona nombra como candidato, durante rueda di prensa prome minister no a confirma esey.
mr. Evelyn Wever-Croes a indica cu e procedura di un candidato cu ta bay reemplasa Milly Schwegle ta uno hopi confidencial. El a enfatisa cu su persona no ta bay duna ningun informacion riba esaki. Rey Willem-Alexander tin e ultimo palabra y unabes cu e tuma un decision, gobierno tin libertad pa papia riba esey. Rey Willem-Alexander ta e presidente di Raad van State.
Procedura
Ainda no ta conoci ken lo tuma e posicion di Milly Schwengle. E minister van Binnenlandse Zaken en Koninkrijksrelaties o consulta cu minister-president di Aruba y cu e vice-presidente di Raad van State. Conseho di Minister di Reino lo tuma e decision di nombra un candidato na Su Mahestad Willem-Alexander pa asina por nombr’e como Consehero di Estado di Reino.
Tocante e “Afdeling advisering van het Koninkrijk”
E Afdeling advisering van de Raad van State van het Koninkrijk ta reuni un biaha pa luna riba un diaranson y generalmente ta conseha tocante e mesun asuntonan cu Afdeling advisering van de Raad van State. E Conseho di Estado di Reino ta ocupa cu e asuntonan cu ta afecta Hulanda y tambe Reino completo. Manera e preocupacion di Rijkswetten. E Afdeling advisering van de Raad van State van het Koninkrijk ta consisti di e miembronan di Afdeling advisering y tres miembro mas asigna pa e demas paisnan di Reino.
Tocante Milly Schwengle
Mildred (Milly) Schwengle a studia ley na e Katholieke Universiteit Nijmegen. Entre 1990 y 1994 el a traha como fiscal adhunto y como griffier na Corte di Husticia. Na 1994 el a bira abogado. El a traha como abogado na Aruba y Corsou y te cu nombramento e tabata partner den e bufete di abogado HBN Law.
Milly Schwengle a bira e representante di Aruba den Raad van State dia prome di november 2017 despues cu e tabata huramenta pa Su Mahestad Rey. El a reemplasa mr. Mito Croes, kende a baha na juni 2016 y a fayece poco despues tambe.
