Korectie Instituut Aruba (KIA) ta enfrentando un reto di varios decada pa modernisa su infrastructura y aumenta su capacidad pa detenido. Durante un conferencia di prensa reciente, a puntra Minister di Husticia y Asunto Social, Rocco Tjon, riba e plan pa desaroyo di e capacidad di e prizon mes.
Segun Minister Tjon, nan ta trahando duro riba esaki enfocando riba varios asunto. Nan ta atende tanto e situacion actual, manteniendo e operacionnan existente, como tambe invertiendo den mehoracion di cuido p’e detenido.
Recientemente, a entrega 22 certificado na personal di KIA pa nan participacion den e metodo di trabou conoci como Youturn. E metodo aki ta uza den e prizonnan hubenil na Hulanda y ta enfoca riba desaroyo di habilidadnan y reintegracion social. E curso aki ta un parti di e esfuerso pa mehora e cuido y guia p’e hobennan cu ta cera den KIA.
Fuera di esey, Minister Tjon a aproba un lista di opleiding, workshop y curso p’e hobennan na KIA pa nan desaroyo personal y profesional. Ta haci hopi esfuerso pa sigura cu e hobennan ta envolvi y ta interesa den nan propio desaroyo. Tin un enfasis grandi riba e importancia di envolvimento di e hobennan p’asina nan por tin exito den nan esfuersonan.
Den un futuro cercano, lo cuminsa cu un proyecto piloto pa fortalece e personal di e jeugd afdeling, cu e meta di guia e hobennan mas eficazmente. Ademas, ta planifica pa ricibi asistencia di personal specialisa di Hulanda pa yuda cu e desaroyo y implementacion di e plan pa un instituto coreccional nobo.
Es decir, tin un inversion significativo den e infrastructura y capacidad di KIA, cual ta inclui tanto desaroyo infrastructural como desaroyo di personal. E dialogo cu autoridad Hulandes lo continua pa sigura cu tin suficiente financiamento disponibel p’e desaroyonan necesario, segun Minister Tjon.
