Pasobra Señor Dios ta un solo y un escudo: Señor ta duna gracia y gloria. E no ta keda sin duna loke ta bon na esunnan cu ta cana den rectitud.( Salmo 84:11).
Tur mayor ta preocupa cu e situacion cu ta reina , bao di nos hubentud, kico ta pasando, y kico ta bay pasa, y con cos a bira asina, pero locual nos no tin di lubida, cu tur locual nos sembra nos lo cosecha, Pasobra Dios su wowo t’ey tur caminda, y Dios ta mira tur cos y e ta cuida nos yiunan, pero nos tin un deber cu Dios, y esey ta cu nos mester lanta nos yiunan den e disciplina y instruccion di Señor. Ningun mata no ta crece si e no wordo muha, y cuida, y si bo kier bon fruta for di un mata, bo mester dedica tempo na su crecemento.
Placa ta necesario den un cas, mester cubri gastonan y cumpra cuminda pa famia, esey tambe ta deber di mayor, pero atencion pa nos yiunan ta bini na prome luga, pasobra material no por reemplasa amor. Hopi mayor ta bisa: No tin un cos cu mi no ta cumpra pa mi yiunan, e muchanan aki tin tur cos, cada un tin un tv di 32 inch den su camber, cada un tin su iphone, cada un tin su tablet, y awor ta bin e pregunta cual ta e ultimo biaha como mayor a sinta papia cu nan tocante e palabra di Dios? E mundo cu su maldad, malisia y inmoralidad, ta haci tur locual ta posibel, pa hala e hoben den scuridad, pasobra nos no mester lubida cu nos lucha no ta contra carni y sanger (Efesionan 6:12), y esun cu no kier a kere y ta haci bofon, awor ta mirando locual cu ta sosode.
Manera ta skirbi den Genesis capitulo 6:5 : E ora ey Señor a mira cu maldad di hende tabata grandi riba tera. Y cu tur intencion di e pensamentonan di su curason tabata continuamente maldad so. Y esey ta locual nos ta confronta awendia, maldad, malicia, inmoralidad, abominacion, rebeldia, arogancia contra Dios, un falta di respet y temor di Dios inmenso, tanto den palabra como den conducta. Pero den tur locual cu ta pasa, y ta bay pasa, pasobra mientras cu nos ta cera nos wowo anochi, e mundo di maldad no ta para keto, p’esey nos mester confia den Dios, y sigui persevera den su palabra, pasobra E ta e unico respaldo cu nos tin. Ora hende no por cu algo nan ta hala para un banda y bisa cu nan no por , cu nan no ta alcansa, pero Gloria na Dios, cu E si no ta lubida riba su pueblo, Dios no ta cambia, Dios ta Todopoderoso, e a priminti cu e lo no bandona , tampoco desampara esnan cu ta kere den dje.
Ken ta sabi? Lage paga bon tino na e cosnan aki, y considera e misericordia di Señor. ( Salmo 107:43). Lot tabata bibando den Sodoma y Gommora y e tabata haci oracion, pasobra e a ripara cu e situacion rond di dje tabata hopi malo, y Dios a tene cuenta tambe cu e intersecion di Abraham, y a manda angelnan bay saca Lot for di e situacion cu e tabata aden. Mesun Dios t’ey pa nos awe como mayor y pa tur nos yiunan, y ora nos confia den Dios, e lo manda angelnan pa cuida nos yiunan tur caminda cu nan bay. Dios t’ey pa tur esnan cu ta confia, E ta mesun Dios. Sinceramente, Pastoor Marcel Balootje.
