Den e ultimo dianan tin speculacion y duda alrededor di e cuestion di Arubahuis, e investigacion andando rib’e ex-minister plenipotenciario, Guillfred Besaril, y su retiro repentino. Segun a informe riba e ultimo aki, el a tuma su retiro debi cu e no tabata satisfecho cu e ‘kindertoelage’ cu el a bin ta ricibi for di aña 2017. Fuera di esaki, un otro cuestion relaciona cu e investigacion andando ta e discrepancia financiero cu tin na Arubahuis y un gastamento di placa sin fin. Ya ta for di algun siman cu oposicion ta entregando peticion pa minister presidente, Evelyn Wever-Croes publica e rapport di dicho investigacion p’asina tanto parlamento y pueblo por sa en berdad kico ta locual a tuma luga na Arubahuis.
Durante un conferencia di prensa awe mainta, a puntra minister presidente tocante esaki riba cua el a bisa cu en berdad el a ricibi di fraccion AVP, cu a pidi u debate publico y partido MAS a pidi e rapport. Segun el a splica, asina cu el a bin compronde cu tabatin cierto cos cu a pasa cu no tabata bon, e mes a cuminsa un investigacion. Personalmente el a pidi Centrale Accountantsdienst pa inicia un investigacion y mientras informacion tabata drenta a tuma decision pa corigi locual no tabata bayendo bon. Aworaki ta wardando e consehonan final pa wak kico ta e decisionnan cu nan ta bay tuma.
“Manera mi a bisa semper, ken cu ta cu haci algo cu no ta bon tin cu carga su responsabilidad.” Pues pueblo y parlamento por tin sigur cu esun cu ta responsabel lo ta responsabilisa debidamente. Mas aleu Wever-Croes a bisa cu e proceso no ta cla y e no por duna un rapport awo cu ta na mita di e proceso y mucho menos tene un debate publico pasobra esaki lo “daña e investigacion.” Pero a compromete su mes cu asina tin tur informacion lo divulga esaki tambe.
Por ultimo Wever-Croes a bisa cu nan lo bay tuma accion, cu e persona t’ey of no t’ey mas y cu na final di dia Besaril a splica riba kico su retiro ta basa y “mi ta kere nos tin cu kere pa loke cu e ta bisa, el a tuma retiro voluntariamente di su mes y e ta biniendo Aruba bek”.
Pa un relato mas amplio, lesa bo proximo edicion di TREMPAN.
