Minister President Evelyn Wever-Croes ta na Costa Rica riba invitacion di Gobierno di Costa Rica pa e acto di inauguracion di Presidente Carlos Alvarado Quesada diamars 8 di mei.
Probechando e biahe aki, Minister President a reuni cu e Rector di e Universidad di medicina, UCIMED, caminda tin varios studiantenan di Aruba. Meta di e reunion aki tawata pa cera conoci pero tambe pa scucha di e progreso di e studiantenan Arubiano na e Universidad.
E conbersacion principal sinembargo tawata riba e problema cu e diploma no ta wordo reconoci na Aruba. Minister President a anuncia cu Gobierno di Aruba ta hopi avansa caba cu e proceso pa yega na un sistema pa reconoce diplomanan. Tawata falta algun detaye di informacion pa loke ta Costa Rica cual ta e mision di e mandatario den su biahe aki tambe na unda el a sigura UCIMED y e studiantenan cu pronto e problema aki lo wordo soluciona. Kiermeen cu e studiantenan Arubiano cu gradua siguientemente lo por haya trabou na Aruba como docter.
Prome Minister ta expresa cu e ta hopi satisfecho cu e papel cu studiantenan Arubiano ta haciendo na UCIMED. E Universidad tambe ta hopi orguyoso di nos studiantenan. Pa Gobierno di Aruba esaki ta un motibo pa wordo yena di satisfaccion pasobra cada Arubiano cu ta biba den exterior ta un embahador di Aruba y semper ta yena nos cu orguyo pa scucha cu nan ta carga nomber di Aruba na halto.
Prome Minister ta satisfecho con e reunion a bay. E mes tambe a studia na e Universidad aki un tempo y tin grato recuerdonan di e tempo ey. Studiantenan tambe a keda hopi contento cu e bishita di e mandatario y cu e atencion cu nan a haya y especialmente cu e compromiso di Gobierno cu nan problemanan lo wordo antendi cu n’e.
