Esaki ta e mensahe cu minister di Salud Publico Dangui Oduber a informa den conferencia di prensa den oranan di mainta. “Aruba ta cla pa ricibi e vacuna. A cumpli cu tur e exigencianan di Hulanda y solamente ta sperando e bishita di control di RIVM.”
Den e conferencia e mandatario a papia den su introduccion riba e estudio di cero prevalencia cu ta bay haci na Aruba riba COVID-19. Tin mas cu 5 mil hende a test positivo di maart pa awo, pero tin hende cu a haya e COVID-19 pero nunca a bay test. Via di e estudio aki lo por haya mas informacion di casonan asina.
Pero tambe el a elabora riba e vacuna cu Aruba ta bay haya for di Hulanda proximamente. Den luna di december tabatin un reunion entre e paisnan di Reino y RIVM riba e procedura cu mester sigui pa ricibi y maneha e vacuna. Hulanda a haya su prome cargamento caba cu ta di e marca Pfizer, esun mas dificil pa loke ta su almacenamento. E mandatario a splica cu pa por ricibi e vacuna Aruba, mester ward’e na un temperatura di -80 grado celsius.
Te aworaki no ta conoci cuanto dosis Aruba lo haya, solamente ta na altura cu pa memey di luna di februari e prome cargamento ta yega Aruba. Tur cos ta depende di e cantidad di vacuna cu ta bay haya, no tin indicacion cuanto ta haya. Hulanda ta haya 8.2 miyon den e prome kwartaal pa cual ta spera di haya algun mil vacuna.
E promenan cu ta bini na remarca pa haya e vacuna ta personal di cuido; grandinan cu ta biba den Casnan di Cuido; grandinan riba 60 aña cu tin malesa grandi; grandinan riba 60 aña bibando na cas y despues ta bin e resto.
Pa haya e vacuna, Aruba mester a prepara su mes debidamente, tanto pa ricibi e vacuna, con ta atende cu ne y distribui esaki. E freezer pa warda vacuna lo haya for di Hulanda y lo yega Aruba dia 13 di januari. Fin di e luna aki lo haya bishita di e delegacion di RIVM pa controla henter e procedura. “Nos ta spera cu despues di e prome kwartaal nos tin mas tanto hende posibel vacuna pa bolbe na normalidad,” e mandatario a bisa.
Pa haya e vacuna, Hulanda a pidi pa entrega un draaiboek na ministerio di salud di Hulanda. Esaki mester a encera e plan di personal, sitio unda ta bay duna e vacuna; e plan di vacunacion masal; coordinacion pa registro di vacuna; logistica pa almacenamento; y tambe plan di conscientisacion riba vacunacion. “Aruba ta cla pa ricibi e vacuna, ya cu nos a cumpli cu tur e exigencianan. Ta spera yegada di e freezernan y bishita di RIVM. Despues ta cuminsa cu vacunacion.”
