Minister di Infrastructura y Telecomunicacion, drs. Rene Herde, a confirma cu Gobierno ta den combersacion cu diferente grupo envolvi den e conflicto relaciona cu operacion di UTV y ATV na Aruba. Segun e minister, e meta ta pa yega na un solucion cu por atende interes di tur partido, prome cu Gobierno mester presenta dilanti corte na october.
Durante un entrevista, Herde a declara cu e negociacionnan ta bayendo bon, pero cu Gobierno a opta pa papia cu cada grupo separada. Esaki, segun e, ta necesario pa compronde miho e preocupacionnan, interesnan y propuestanan di cada sector.
“No ta negocia cu un solo partido. Nos ta negociando cu tur partido,” Herde a bisa.
Ademas di e operadornan cu ta representa pa organisacionnan conoci den e sector, Gobierno a identifica otro gruponan cu ta desea di participa den e dialogo. Entre nan tin piscadornan, tour guidenan y otro operadornan cu tambe ta considera cu nan actividadnan por keda afecta door di cualkier decision nobo.
Herde a splica cu tur grupo ta bonbini na mesa di dialogo, basta cu nan comparti e mesun meta: yega na un solucion sostenibel pa Aruba. E minister a indica cu e combersacionnan individual ta permiti Gobierno tende cada partido bon, analisa unda nan posicionnan ta acerca otro y identifica punto cu anteriormente kisas no a wordo tene na cuenta.
Segun Herde, e proceso ta exigi confiansa, pasenshi y disponibilidad pa tende otro.
“Bo mester duna y scucha bon, pa bo no trapa riba ningun hende, pero tampoco pa bo no lubida nada,” e minister a declara.
E titular di Infrastructura a enfatisa cu Gobierno no ta perde tempo. Despues cu hues a duna espacio pa dialogo, operadornan a presenta nan propio proposicion pa un posibel protocol. Gobierno a tuma e documento como punto di salida pa sigui cu e combersacionnan.
Un dia despues, segun Herde, Gobierno a sinta cu representantenan di ABC, mientras cu e dialogo cu otro gruponan tambe ta sigui. E minister a laga cla cu ningun grupo ta exclui y cu Gobierno ta dispuesto pa tende tur partido cu ta desea forma parti di e proceso.
Herde ta spera cu a corto plazo por tin noticia mas concreto. E fecha di 5 di october ta funciona como un deadline importante, ya cu Gobierno mester informa hues tocante progreso di e negociacionnan y unda e proceso a yega.
E minister a expresa speransa cu, prome cu e fecha ey, e partidonan por logra un acuerdo final, pero a reconoce cu, si esaki no sosode, hues lo mester wordo informa cu exactitud tocante e resultado di e dialogo.
“Nos ta bayendo den bon caminda,” Herde a sigura. “Nos tin fe cu nos por yega na un bon solucion.”
E conflicto rond di UTV y ATV a pone diferente interes tegenover otro, incluyendo proteccion di naturalesa, siguridad, turismo, actividad economico y posicion di e operadornan cu pa añanan ta activo den e sector. Gobierno ta purba uni e diferente posicionnan awo den un protocol cu por ofrece claridad y evita cu e situacion sigui prolonga.
Pa Minister Herde, e proceso no ta solamente pa logra un acuerdo huridico, sino tambe pa crea un base pa cooperacion entre Gobierno, e operadornan y otro gruponan cu ta depende di uzo di e terenonan y camindanan afecta.
Pa mas lesa TREMPAN.COM.
