Durante un conferencia di prensa, minister Glenbert Croes, a anuncia cu aña pasa el a reuni cu e ex-minister di Ecuador. Minister a comenta cu e meta fundamental di Gobierno di Aruba ta pa baha e prijs di awa y coriente, pues p’e motibo ey ta sondea unda tur tin posibilidad pa logra acuerdo na beneficio di e pueblo di Aruba.
Gobierno a ricibi e conseho, en bista cu PetroEcuador ta suministrando Aruba pa algun aña caba cu Heavy Fuel Oil, pa reuni cu e compania na Ecuador. Den pasado e acuerdo tabata pasa door di dos intermediario. Segun e minister, si elimina e intermediarionan y cumpra direct for di PetroEcuador, lo baha e costo di Heavy Fuel Oil. Asina lo pasa esaki pa W.E.B. pa nan por baha e prijs di awa y coriente.
E minister a continua bisando cu segun W.E.B. su structura di costo pa produccion di awa y coriente, HFO ta keda un componente grandi. Pues ora logra un miho prijs y un bon descuento esaki lo yuda pa pueblo por sinti esaki.
Despues di e prome bishita, por a tuma nota cu tabatin un cambio di minister aya na Ecuador, Minister Glenbert Croes a comenta cu Embaha di Hulanda na Peru hunto cu Consulado General di Hulanda na Ecuador a haci tur esfuerso pa continua traha basa riba e prome reunion. Durante e di dos reunion el a bay hunto cu Edison Briesen kende ta e Presidente pa e Hunta di Comisario di RdA. El a reuni cu e presidente nobo Fernando Santos Alvite y e vice presidente di hidrocarburo Ruben Dario Espin Zapata.
Minister Croes a remarca di ta agradecido cu e embahada di Hulanda mirando cu p’e, e sosten diplomatico for di e embahada di Hulanda ta importante pa habri e portanan di un forma corecto y digno. Asina tambe, segun e minister, ta demostra e seriedad di parti di Gobierno di Aruba pa cualkier cu negosha cu ne. Presente na e reunion tabata t’ey e ehecutivonan halto di PetroEcuador.
Minister Croes a comenta cu durante e reunion a sali dilanti e boluntad di Gobierno di Ecuador pa coopera cu e solicitud di Aruba pa logra un relacion directo entre nos companianan nacional pa por cumpra combustibel direct sin mester di intermediario. Segun Croes, nan a expresa cu esey tambe ta nan intencion, pues pa compania nacional no mester haci uzo di intermediario.
