Riba e pregunta si ta existi un division entre opinion di profesionalnan di companianan estatal, Minister di Energia, Glenbert Croes a confirma esey bisando cu e ta obvio. Door di wak for di e lens di política, Croes ta kere cu e desacuerdo actual entre WEB Aruba N.V. y sindicato VWI ta trata mas bien cu tin hende no ta gusta cu ta un gobierno di MEP atrobe ta bay ehecuta un proyecto di parke di molina di biento.
Minister Croes: “Bo tin e profesionalnan cu ta kere den e vision di gobierno, cu kier weita e expansion di parke di Molina di biento realisa; no solamente pa cumpli cu e plan energetico nacional y e transicion energetic cu nos ta kere den dje, pero e generacion di energia aki (eolico) ta esun di mas barata y esey ta na interes di nos pais, e ta conforme nos plan.”
P’esey, e titular di energia a indica cu e ta asombra y no por compronde con por tin hende ta contra di un proyecto asina importante. “E unico cos cu tin ora, como político; e unico conclusion cu mi por yega na dje y si mi ta fout, mi ta pidi dispensa, ta cu nan problema ta cu ta un gobierno cu no ta agrado di tur hende ta realizand’e. Mescos cu ta MEP a realisa e proyecto di Vader Piet, un minister di MEP ta realizando e di dos parke di molina di biento,” asina Minister Croes a bisa, añadiendo cu “pasobra por ta no ta ni Mike eman, ni Mike de Meza. Esey ta e impresion cu mi ta haya si.”
