Diamars 24 di october DOW a inicia cu e proyecto di instalacion di e luznan nobo y adicional den Caya G.F. (Betico) Croes. E instalacion ta inclui 50 palo di luz nobo reemplasando esunnan existente y cu no ta funciona debidamente.
Minister di Asuntonan Economico, mr. Geoffrey Wever, ta contento di mira e inicio di proyecto di iluminacion, mirando cu esaki tin basta tempo den planificacion. E mandatario a splica cu e proyecto di revitalisacion di Oranjestad ta consisti di diferente proyectonan cu hunto mester trece un impacto positivo den centro di ciudad. Pa ambos, San Nicolas y Oranjestad, iluminacion y siguridad ta importante pa cual a scoge pa atende cu e reto aki inmediatamente.
Pa atende cu e aspecto di siguridad pa haci Gaya G.F. (Betico) Croes mas atractivo anochi, a haci un inversion di mas di 60 mil florin pa iluminacion.
Fuera di iluminacion, tin otro proyectonan di infrastructura plania y tambe den ehecucion. Un ehempel di esaki ta e proyecto di Wilhelminastraat y Columbusstraat, cual pronto, finalmente, lo termina. E proyecto aki ta atende cu accesibilidad, crea mas espacio publico, facilidad di permiso pa precario, percura pa mas limpiesa y expansion di parkeer, cu tin e meta principal di drecha e atmosfera empresarial den e area.
Minister Wever ta indica di ta na altura cu tin diferente reto pa atende cu nan den e cuadro di revitalisacion den e area, y cu esaki tin su debido atencion. Ta trahando duro cu diferente gruponan envolvi pa atende cu e proyectonan realisabel a corto plaso, mientras ta preparando pa e proyectonan mas duradero y a largo plaso.
Colaboracion entre sector priva y gobierno ta keda esencial den realisa un centro di ciudad revitalisa, cu destinacion pa haci Oranjestad un centro di gastronomia y vivienda. E mandatario ta gradici tur esunnan envolvi pa nan esfuerso, y e comerciantenan pa nan pasenshi y comprension.
