Recientemente a formalisa e nombracion di algun miembro nobo di Sociaal- Economische Raad (SER). Un organo consultativo independiente estableci pa ley, cu ta duna conseho solicita of no solicita -gevraagd of ongevraagd advies- na Gobierno di Aruba riba temanan di mayor importancia riba tereno socio-economico. Pa medio di consulta mutuo, intercambio di opinion y argumentacion, e organo consultativo ta tuma decisionan referente e contexto, contenido y forma di consehonan, rapportnan di investigacion y notanan cu ta presenta na gobierno riba maneho socio-economico.
E constelacion di SER ta consisti di un maximo di nuebe representante di cual tres representante di organisacionan di dunadonan di trabao, tres representante di organisacionan di empleadonan y tres experto independiente. Cada miembro tin un miembro suplente cu durante su ausencia lo ta su reemplasante durante reunionnan.
Pa loke ta trata representantenan di ATIA e renombra Tristan Every como miembro y a nombra Enrique “Tito” de Cuba como miembro suplente. Como representante di SIMAR a nombra Angelique Roos-Qiujada como miembro. Pa loke ta trata expertonan independiente a nombra Marilinda Mansur-Croes como miembro independiente y como miembronan suplente, Igmar Reyes y Robert Moons.
Den e mesun proceso aki tambe a despedi di Ronnie van Trigt como miembro suplente representando ATIA y Josephine Albertus como miembo representando SIMAR.
Minister di Asuntonan Economico, Comunicacion y Desaroyo Sostenibel, Geoffrey Wever ta desea e miembronan nobo di SER exito cu e tarea importante aki y ta gradici ex-miembronan pa nan contribucion. SER su consehonan, rapportnan di investigacion y notanan ta instrumentonan esencial y cu balor agrega pa e proceso completo di maneho y asina tambe riba desaroyo di Aruba.
